Reseıde 160 kg marıhýana satpaq bolǵan qazaqstandyq sottaldy
ASTANA. QazAqparat - RF Chelıabi oblysynda 160 kg marıhýana satpaq bolǵan qazaqstandyqqa 9 jylǵa bas bostandyǵynan aıyrý jazasy berildi, dep habarlaıdy Chelıabi oblystyq prokýratýrasy.
«Chelıabi oblysynyń Bredın aýdandyq soty Qazaqstan Respýblıkasynyń azamaty Gamıd Ahmedovke qatysty qylmystyq is boıynsha úkim shyǵardy. Ol RF QK 229.1-babynyń 4-bóliginiń «b» tarmaǵynda (adamdar tobynyń aldyn ala sóz baılasý negizinde iske asyrǵan erekshe kóp mólsherdegi esirtki zattardyń kontrabandasy), RF 228.1-babynyń 5-bóliginde (adamdar tobynyń aldyn ala sóz baılasý negizinde iske asyrǵan erekshe kóp mólsherdegi esirtki zattardy zańsyz ótkizýge qastyq etýi) jáne 30-babynyń 3-bóliginde kórsetilgen qylmystardy jasady dep tanyldy. Sot Ahmedovke 9 jyl bas bostandyǵynan aıyrý jazasyn berdi, ol jazany qatań rejımdegi kolonııada óteıdi», - delingen habarlamada.
Ahmedov Qazaqstan Respýblıkasynyń Qostanaı oblysynda 158 kılogramnan astam kannabıs (marıhýana) esirtki zatyn alyp, Reseıde satpaq bolǵan.
2017 jyldyń mamyrynda 15 qapqa salynǵan esirtkini Reseı shekarasynan alyp ótpek bolǵan júk kóligi ustalady. Júrgizýshisi qaptardyń ishinde ne barynan habary bolmaı shyǵady. Al «erekshe júkti» qarsy alý úshin Ahmedov Chelıabi oblysynyń Bredın aýdanyna barady. Sol jerde ol sóz baılasqan sybaılasymen birge ustalady.
Úkim zańdy kúshine engen joq. Qylmysqa qatysy bar degen ekinshi kúdiktige qatysty qylmystyq is áli tergelip jatyr.
