Reseıde 14 qazaqstandyqtyń qaqtyǵys aýmaǵynan shyǵarylatyny ras pa — mınıstrlik jaýaby
ASTANA. KAZINFORM — Syrtqy ister mınıstrligi áleýmettik jelilerde taraǵan «14 Qazaqstan azamaty qaqtyǵys aýmaǵynan Reseıdegi Qazaqstan elshiligine jetkiziledi» degen aqparatqa túsinikteme berdi.
Mınıstrlik bul aqparattyń shyndyqqa sáıkes kelmeıtinin resmı túrde málimdedi.
— Áleýmettik jelilerde 14 Qazaqstan azamaty qaqtyǵys aýmaǵynan Qazaqstan Respýblıkasynyń Reseı Federatsııasyndaǵy elshiligine jetkiziledi degen rastalmaǵan málimet tarap jatyr. Bul taqyryptyń qoǵam úshin, ásirese azamattarymyzdyń týǵan-týystary úshin qanshalyqty mańyzdy ekenin tolyqtaı túsinemiz. Sondyqtan tekserilmegen málimetterdi taratýǵa múldem jol berilmeýi tıis, — dep jazylǵan QR SІM málimdemesinde.
Vedomstvonyń habarlaýynsha, mundaı aqparat jaqyndarynan habar kútip otyrǵan otbasylardy adastyrady, negizsiz úmit týdyrady ári azamattardy qorǵaý jónindegi Mınıstrliktiń jumysyna keri áserin tıgizýi múmkin.
— Mınıstrlik Reseı tarapymen túrli deńgeıde jumysyn jalǵastyryp keledi. Másele turaqty baqylaýda. Bul jumystyń nátıjeleri týraly SІM qosymsha habarlaıdy. Azamattar men BAQ ókilderin tek resmı derekkózderge súıenýge shaqyramyz, — dedi SІM.
Aıta keteıik, el zańnamasynda jalǵan aqparat taratqany úshin jaýapkershilik kózdelgen.
Buǵan deıin QR Syrtqy ister mınıstrligi Reseımen qaqtyǵys aımaǵyndaǵy qazaqstandyqtardy elge qaıtarý boıynsha kelissóz júrgizip jatqany habarlandy.
