Reseıde 1 jasar bala mas anasynyń kesirinen aıazda úsip qaldy
ASTANA. QazAqparat - RF Prımore ólkesinde «kámelet jasqa tolmaǵan balaǵa tárbıe berý mindetin tıisti oryndamaǵany» úshin áıel adamǵa qylmystyq is qozǵaldy. Ólke turǵyny aıazdy túni bir jasar balasyn dalaǵa qaldyryp ketken. Qyz balanyń qoly, aıaqtary úsip, qatty sýyq tıgen, dep habarlady óńirdiń ІІM basqarmasynan.
TASS agenttiginiń jazýynsha, oqıǵa Mıhaılovka aýylynda bolǵan. Aldyn ala derekter boıynsha, ishimdik iship, mas bolǵan áıel balasyn dalada qaldyryp ketken.
«36 jastaǵy áıel týǵan kún toılap, úıine mas bolyp oralady. Úıge jetkende qol arbadaǵy balasyn syrtta umytyp, ózi úıge kirip uıyqtap qalǵan», - dedi vedomstvo ókili. Úsip qalǵan balasyn jumystan oralǵan ákesi kórip, dereý dáriger shaqyrtady.
Sol túni aýa temperatýrasy -20 gradýstan tómen bolǵan. Mundaı jaǵdaı atalǵan aımaqta birinshi ret oryn alyp otyrǵan joq. Birneshe kún buryn Vladıvostokta mas ata-anasy tórt jasar balasyn kireberiste umytyp ketken.
