Reseı Joǵary hokkeı lıgasynda oınaıtyn «Saryarqa» jeke-dara kósh bastady
ASTANA. 22 jeltoqsan. QazAqparat - Reseıdiń Joǵary hokkeı lıgasynda oınaıtyn eki klýbymyz da sońǵy oıyndarynda jeńiske jetip, jankúıerlerin qýantty.
Qaraǵandynyń «Saryarqasy» Saratovta jergilikti «Krıstall» klýbyn 2:1 esebimen jeńip, osy lıgada jeke-dara kósh bastady. Qazir «Saryarqa» klýbyn 33 oıynnan 75 upaı enshilep, birinshi orynda tur. Aıta keteıik, ekpin alǵan kenshiler klýby Reseıdiń Joǵarǵy hokkeı lıgasyndaǵy rekordtardy da jańartyp keledi. Mine, qatarynan 16 oıynda jeńiske jetip, reseılikterdiń ózderin tamsandyryp júr. «Saryarqa» byltyr qatarynan 12 oıynda jeńiske jetken «Toros» klýbynyń rekordynan asyp ketkeli qashan...
Bul joly «Saryarqaǵa» Óskemenniń «Qaztsınk-Torpedo» klýby da kómektesti. Shyǵysqazaqstandyqtar óz aıdynynda Qaraǵandy klýbynyń ókshesin basyp kele jatqan «Rýbın» (Tıýmen) hokkeıshilerin 2:0 esebimen tizerletti. Sóıtip, «Saryarqa» ekinshi oryndaǵy «Rýbınnen» bes upaı uzap ketti.
Ókinishke qaraı, «Qaztsınk-Torpedonyń» jaǵdaıy asa jaqsy emes. Óskemen klýby 33 oıynnan 54 upaı jınap, Joǵarǵy hokkeı lıgasynda 10-orynǵa kóterildi. Biraq keıingi kezde «Qaztsınk-Torpedonyń» da oıyny úılesip, jeńisteri jıilep keledi. Maýsym bastalǵan soń bas bapkerin aýystyryp, komanda tizginin Igor Dorohınge ustatqaly Óskemen klýby «qaryshtap adymdaı» bastady. Bul turǵyda Óskemen klýbynyń azýly «Rýbın» klýbynan basym túskendigin erekshe atap ótýge bolady. Birneshe oıynshysy jastar arasyndaǵy álem chempıonatynan, al endi birnesheýi Rýmynııada baq synaǵan qurama sapynan kelse de, Igor Dorohın olardyń sharshap kelgenderin umyttyryp, osy oıynda qaısarlyq tanytýǵa jumyldyra aldy, dep jazady «Alash aınasy» basylymy.
