Reseı janarmaı naryǵynda jańa salyq tetikterin engizedi
ÓSKEMEN. KAZINFORM — Reseı Prezıdenti Vladımır Pýtın ishki naryqty janarmaımen qamtamasyz etýdi yntalandyrýǵa baǵyttalǵan Salyq kodeksine engizilgen túzetýlerge qol qoıdy, dep habarlaıdy TASS.
Jańa ózgeristerdiń negizgi baǵyty – tikeleı aıdalǵan benzındi basqa komponenttermen aralastyrý arqyly óndiriletin avtomobıl benzınine aktsız salý tetigin engizý. Endi osy tásilmen joǵary oktandy benzın shyǵarý janarmaı óndirýmen teńestiriledi.
Munaı shıkizatyn óńdeýge arnalǵan kýáligi bar salyq tóleýshilerge, onyń ishinde benzındi aralastyrý arqyly óndirgen jaǵdaıda da, aktsız boıynsha shegerim qarastyrylǵan.
Túzetýler óndiristik qýattardy jańǵyrtý jóninde kelisim jasasqan munaı óńdeý zaýyttarynyń ınvestıtsııalyq mindettemelerin oryndaý múmkindigin de keńeıtedi. Buǵan deıin kásiporyndar 2014 jylǵy 1 shilde men 2026 jylǵy 1 qańtar aralyǵynda quny keminde 60 mlrd rýbl bolatyn jabdyqty paıdalanýǵa berýi tıis bolsa, endi bul merzim 2026 jylǵy 31 jeltoqsanǵa deıin uzartyldy. Sonymen qatar eń tómengi ınvestıtsııa kólemi 100 mlrd rýblge deıin ulǵaıtyldy.
Zań aıasynda janarmaı dempferi tetigi de qaıta qaraldy. Eýrazııalyq ekonomıkalyq odaqqa múshe elderde óndirilip, Reseıge ýákiletti uıymdar arqyly ımporttalǵan benzın úshin ótemaqy koeffıtsıenti 2026 jylǵy 1 maýsymnan bastap 0,9 deńgeıinde belgilendi.
Al EAEO-dan tys elderde óndirilgen benzınge dempferdi esepteýdiń jeke tártibi engiziledi.
Ol Úndistan naryǵyndaǵy ındıkatıvtik benzın baǵasy men Úndistannyń teńiz porttarynan jetkizý shyǵyndary negizinde ımporttyq parıtet boıynsha aıqyndalady. Bul kórsetkishti Reseıdiń Federaldyq monopolııaǵa qarsy qyzmeti belgileıdi.
Jańa normalar búginnen bastap kúshine endi jáne 2026 jylǵy 1 maýsymnan bastap týyndaǵan quqyqtyq qatynastarǵa qoldanylady.
Buǵan deıin Qazaqstannyń Energetıka mınıstrligi Reseıden resmı ótinish túsken jaǵdaıda janar-jaǵarmaı materıaldaryn kommertsııalyq negizde jáne ishki naryqqa zııan keltirmeı jetkizý múmkindigin qarastyrýǵa daıyn ekenin málimdegen edi.
