Reseı jaldap kelgen polıgondardy qaıtarý týraly bastamany Qazaqstan jasady - M. Altynbaev
ASTANA. QazAqparat - Reseı jaldap kelgen polıgondardy qaıtarý týraly bastamany Qazaqstan jasady. Bul týraly búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda senator Muhtar Altynbaev málim etti.
Eske salaıyq, otyrysta «1996 jylǵy 18 qazandaǵy Qazaqstan Respýblıkasy men RF arasyndaǵy Saryshaǵan synaq polıgonyn jaldaý týraly shartqa ózgerister men tolyqtyrýlar engizý týraly hattamany ratıfıkatsııalaý týraly» zań jobasy talqylanǵan bolatyn.
Aıta keterligi, qazirgi tańda Qazaqstan Reseıge Saryshaǵan polıgon aýmaǵy úshin 8 mln. 325 myń gektardy jalǵa berip otyr. Bul aýmaqtar kólemi qysqartylý ústinde.
«Jaldaýǵa berilgen jerlerdi qaıtaryp alý, eń birinshiden, elimizdiń ekonomıkalyq múddelerine sáıkes keledi. Biz Reseı tarapy jaldaýdan shyǵaratyn jer ýchaskelerin taǵy da naqtylaı otyryp, ony paıdalaný tártibin de jetildire túsýimiz kerek. Tutastaı alǵanda, Reseı Qazaqstanda polıgon úshin jaldap otyrǵan jer ýchaskelerin qysqartyp jatyr, keleshekte de qysqartylýy múmkin. Bul olarǵa túsken ekonomıkalyq qıyndyqtarmen de baılanysty shyǵar. Degenmen, polıgonnyń jer ýchaskelerin qysqartý týraly bastamany Qazaqstan tarapy kóterdi. Elbasy tapsyrma berip, ony tıisti oblys ákimdikteri men múddeli mınıstrlikter qoldady. Osyny eskerýge tıispiz», - dedi M. Altynbaev. Onyń aıtýynsha, jalǵa berilip otyrǵan áskerı polıgondardy tek Reseıdiń múlki retinde qaraýǵa bolmaıdy. Senator paıyzdyq úleske salsa polıgonnyń basym bóligin Qazaqstannyń ózi paıdalanyp jatqanyn málim etti. «Onyń ústine Saryshaǵan aýmaǵyn keleshekte halyqaralyq polıgon retinde de qoldaný máselesin oılana bergen abzal. Óıtkeni, dál osyn Saryshaǵan sekildi atý uzaqtyǵy jaǵynan biregeı polıgon Reseıde de, Qytaıda da joq. Sonymen qatar, zamanaýı zymyrandy keshenderdi de osy aýmaqta synaý qolaıly. Bul ınfraqurylymdy keleshekte de damyta bergen durys», - dedi M. Altynbaev.
Talqylaý barysynda senator Nurtaı Ábiqaev Reseı jaldap otyrǵan nemese jaldan shyǵarǵan polıgondy Qazaqstan ózi de belsendi túrde ıgerip, ony keńinen paıdalaný týraly másele kóterdi. «Bizdiń Reseımen áskerı yntymaqtastyq týraly sharttarymyz bar. Sonymen qatar, bul polıgondardy Reseımen birlesip Qazaqstannyń da áýe qorǵanysy kúshteri retinde odan ári paıdalanýdy jalǵastyrýǵa tıispiz», - dedi N. Ábiqaev.
