Reseı uıaly baılanys sıgnaldaryn tunshyqtyratyn arnaıy qurylǵylardy zańdastyrýy múmkin
ASTANA. 28 aqpan. QazAqparat - Reseı uıaly baılanys sıgnaldaryn tunshyqtyratyn arnaıy qurylǵylardy zańdastyrýy yqtımal.
«Kommersant» basylymyna belgili bolǵanyndaı, bul bastama 16 naýryzda Radıojıilik jónindegi memlekettik komıssııanyń otyrysynda qaralmaq.
Áńgime teatrlarda, shirkeýlerde jáne memlekettik synaq kezinde telefondardyń qońyraýlaryn tunshyqtyratyn shý generatorlary nemese radıosıgnal blokıratorlary týraly bolady dep kútilýde, dep habarlaıdy RBK.
Ázirshe, derekkózdiń habarlaýynsha, atalmysh qurylǵylardy aımaqtan tys ornalasqan telefondardyń baılanysyna kedergi keltirmeıtindeı etip jóndep, kúıge keltirý úshin tájirıbelik synaq jumystary júrgizilýde. Sonymen qatar blokıratorlardyń qandaı oryndarda jáne qansha ýaqytqa qoıýǵa bolatynyn rettep, naqty belgileý qajet.
«Mundaı ruqsat jappaı berile bermeýi tıis. Óıtpegen jaǵdaıda baılanys operatorlarynyń tabysy kemıdi. Sondaı-aq abonentterdi qulaqtandyrý men olardyń kelisimin alý júıesi jasalýy tıis. Baılanys tunshyqtyrylatyn aýmaqta taksofondardyń tarıfterin sharyqtatý arqyly bıznes jasaýlaryna da jol bermeýimiz kerek», - deıdi ol basylymǵa bergen suhbatynda.
Qazirdiń ózinde radıosıgnaldardyń blokıratorlaryn ınternet-dúkender arqyly satyp alýǵa bolady. 500 metrlik radıýsty qamtı alatyn osyndaı qurylǵy 500 myń rýbl turady.
Derekkózdiń aıtýynsha, búgingi tańda radıosıgnaldar keıbir teatrlarda tunshyqtyrylady, biraq ol zańsyz is-áreket bolyp tabylady.
Bastama memlekettik synaq ótkizý kezinde mektepterde de qoldanylady dep boljanýda.
