Reseı úshin qazaqstandyq gazdyń eksporttyq baǵasyn tómendetý máselesi kóterilmeıdi - Qazaqstannyń Premer-Mınıstri
ASTANA. Qyrkúıektiń 7-si. QazAqparat - Reseı Federatsııasy men Qazaqstannyń arasynda gazdyń eksporttyq baǵasy týraly másele anyqtalǵan, belgilengen jáne qazir bul másele kóterilmeıdi, dep málim etti Qazaqstannyń Premer-Mınıstri Kárim Másimov Irkýtsk qalasynda ótip jatqan VI Baıkal ekonomıkalyq forýmynda sóılegen sózinde. Bul týraly RBK agenttigi habarlady.
«Qazaqstan, qajet bolǵan jaǵdaıda, «Gazprom» úshin gaz baǵasyn tómendetýge ázir me?», - degen saýalǵa bergen jaýabynda K.Másimov: «baǵa saıasaty anyqtalyp, kelisimshart jasalǵanyn» atap kórsetti. «Baǵa belgilengen jáne Reseı Federatsııasy tarapynan Qazaqstanǵa qatysty bul másele kóterilgen joq», - dedi Qazaqstan premeri óz sózinde.
K.Másimov sondaı-aq, Qazaqstannan gaz eksporttaýmen Qazaqstan úkimeti men «GazProm» AAQ teń negizde ıelik etetin «QazResGaz» kompanııasy aınalysatynyn eske saldy.
2010 jyly «GazProm» qazaqstandyq gazdy 2009 jylǵy deńgeıde satyp alatynyn buǵan deıin habarlaǵan bolatyn. Byltyr «Gazprom» 37,3 mıllıard tekshemetr ortalyqazııalyq gaz satyp aldy, onyń ishinde, 11,8 mıllıard tekshemetri - Túrkimenstannan, 15,4 tekshemetri - Ózbekstannan, 10,1 mıllıard tekshemetri - Qazaqstannan satyp alyndy. Ortalyqazııalyq gaz Ýkraınaǵa jáne Zakavkaz elderine jetkiziledi. 2007 jyldan beri Qazaqstannyń ońtústiginiń tutynýshylary ózbek gazymen qamtamasyz etilip keledi.
Esterińizge sala keteıik, «Gazprom» men «QazMunaıGaz» Ulttyq kompanııasy 2002 jyldyń maýsym aıynda parıtetti negizde Qazaqstanda QazResGaz» birlesken kásipornyn quryp, tirkegen bolatyn. Bul kompanııa tabıǵı gazdy satyp alýmen, onyń marketıngimen, Reseıdiń gaz óńdeý kásiporyndarynda kógildir otyndy óńdeýmen jáne basqa da qyzmettermen aınalysady.
