Reseı, Ýkraına jáne AQSh arasyndaǵy kelissózderdiń alǵashqy kúni aıaqtaldy
ASTANA. KAZINFORM — Birikken Arab Ámirlikteriniń astanasy Abý-Dabıde Vashıngtonnyń araaǵaıyndyǵymen Reseı men Ýkraına arasyndaǵy qaqtyǵysty retteýge baǵyttalǵan dıplomatııalyq kelissózder jalǵasyp jatyr.
10 qarashada Abý-Dabıde Reseı, Ýkraına jáne AQSh ókilderiniń úshjaqty kelissózderiniń alǵashqy kúni aıaqtaldy. Kezdesý 40 mınýttyq úzilisti qosa alǵanda, shamamen tórt jarym saǵatqa sozyldy, dep habarlaıdy TASS.
Agenttik málimetinshe, kelissózder sársenbi, 11 qarashada qaıta jalǵasady.
Ýkraınanyń «Ýkrınform» agenttigi de eldiń Syrtqy barlaý qyzmetiniń baspasóz qyzmetine silteme jasap, konsýltatsııalardyń jalǵasatynyn habarlady.
AQSh Memlekettik hatshysy Marko Rýbıo kelissózderdiń alǵashqy kúnin jaqsy baǵalap, taraptardyń áli de atqaratyn jumysy kóp ekenin aıtty.
— Abý-Dabıdegi kelissózder óte nátıjeli ótken sııaqty. Degenmen alda áli kóp jumys bar. Bul másele aldaǵy 24 saǵatta sheshiledi dep aıta almaımyz, — dedi Rýbıo Parıjde jýrnalısterge bergen suhbatynda.
Marko Rýbıo G7 elderi syrtqy ister mınıstrleriniń kezdesýine qatysyp jatyr.
Onyń aıtýynsha, Vashıngton uzaq merzimdi retteýge qol jetkizý úshin aldaǵy ýaqytta kelissózderge Eýropa elderin de qosýdy kózdep otyr.
Úshjaqty kezdesý bastalmaı turyp, Ýkraına delegatsııasy Eýropa memleketteriniń, NATO men Eýropalyq odaqtyń ókilderimen, sondaı-aq AQSh kelissóz júrgizýshilerimen jeke konsýltatsııalar ótkizdi.
Al Reseı Syrtqy ister mınıstri Sergeı Lavrov eýropalyq ókilderdiń kelissózderge qatysýyna kúmánmen qarady. Máskeýde ótken baspasóz máslıhatynda ol Reseı tarapy olardy qazirgi úshjaqty formattyń tikeleı qatysýshylary retinde qarastyrmaıtynyn ańǵartty.
Lavrovtyń sózinshe, Máskeýmen kelisilgen Vashıngton usynysyna sáıkes, kelissózder aımaqtaǵy ujymdyq qaýipsizdik máselelerine jáne jan-jaqty retteý jónindegi kelisimge qol jetkizilgennen keıin kúshine enýge tıis kepildikterge arnalǵan.
Osylaısha, kelissózderdiń negizgi taqyryptary qaýipsizdik kepildikteri, qaqtyǵys aıaqtalǵannan keıin Eýropadaǵy qaýipsizdiktiń jańa júıesin qalyptastyrý jáne bolashaqtaǵy qaterlerdiń aldyn alý tetikterin ázirleý bolyp otyr.
AQSh tarapy alǵashqy kúnniń nátıjesin oń baǵalaǵanymen, konsýltatsııalardyń egjeı-tegjeıi ázirshe jarııalanǵan joq. Qandaı da bir naqty kelisimge qol jetkizilgeni týraly aqparat ta túsken joq.
Eske salaıyq, buǵan deıin Abý-Dabıde Reseı, AQSh jáne Ýkraına arasyndaǵy úshjaqty kelissóz bastalǵanyn habarlaǵan edik. BAÁ astanasyndaǵy kezdesý baspasóz úshin jabyq formatta ótip jatyr.