Reseı, Ýkraına jáne AQSh arasyndaǵy kelissózder 10-11 qarashada Abý-Dabıde ótedi
ASTANA. KAZINFORM — Reseı, Ýkraına jáne AQSh arasyndaǵy úshjaqty kelissózderdiń jańa kezeńi 10–11 qarashada Birikken Arab Ámirlikteriniń astanasy Abý-Dabıde ótedi. Bul týraly AQSh prezıdentiniń arnaıy ókili Stıv Ýıtkoff málimdedi. Bul týraly Kazinform Deutsche Welle basylymyna silteme jasap habarlady.
Ýıtkofftyń aıtýynsha, kelissózder AQSh-tyń araǵaıyndyǵymen jumys toptary deńgeıinde ótedi. Kezdesý Donald Tramp ákimshiliginiń Ýkraınadaǵy soǵysty toqtatýǵa baǵyttalǵan kúsh-jigeri aıasynda uıymdastyrylady.
— Talqylaýlar soǵystan keıingi qaýipsizdik, shıelenisti báseńdetý, gýmanıtarlyq bastamalar jáne beıbitshilikke bastaıtyn kelesi qadamdarǵa arnalady, — dep jazdy AQSh prezıdentiniń arnaıy ókili X áleýmettik jelisinde.
Budan bólek, osy aptada amerıkalyq kelissóz júrgizýshiler Brıýsselde Frantsııa, Germanııa, Ulybrıtanııa, Eýropalyq odaq jáne NATO ókilderimen kezdesedi. Taraptar Ýkraınanyń qaýipsizdik kepildikterin, Eýropadaǵy bolashaq qaýipsizdik júıesin jáne eldi qalpyna keltirýge ekonomıkalyq qoldaý kórsetý múmkindikterin talqylaıdy.
Ýıtkoff buǵan deıin Kıev, Oslo jáne Sankt-Peterbýrgte ótken kezdesýlerdiń nátıjesin eskere otyryp, kelissózder úderisi odan ári ilgerileıdi degen úmit bildirdi.
Buǵan deıin Reseı prezıdenti Vladımır Pýtın qarasha aıynyń birinshi jartysynda AQSh pen Ýkraına qatysatyn úshjaqty kelissózderdi qaıta bastaýǵa daıyn ekenin málimdegeni habarlanǵan bolatyn. Bul týraly Reseı basshysynyń kómekshisi ıÝrıı Ýshakov 21 qazanda Sankt-Peterbýrgte Pýtınniń AQSh prezıdentiniń arnaıy ókili Stıv Ýıtkoffpen kezdesýinen keıin aıtqan edi. Onyń sózinshe, kelissózderdiń negizgi taqyryby Reseı men Ýkraına úshin qaýipsizdik júıesin qalyptastyrý bolýǵa tıis.
