Reseı — Ýkraına máselesinde Qazaqstannyń yqpaly qandaı — saıasattanýshy pikiri

ASTANA. KAZINFORM — Reseı — Ýkraına máselesin sheshýde Qazaqstan yqpal ete ala ma? Bul saýalǵa Kazinform agenttiginiń YouTube arnasynda shyǵatyn «BIZDIÑ ORTA» podkasty barysynda saıasattanýshy, halyqaralyq qatynastar boıynsha sarapshy Rızzat Tasym jaýap berdi.

— Asyǵystyq tanytpaý kerek, Prezıdent birneshe márte aıtqan edi, qajet jaǵdaıda Qazaqstan deldal nemese úshinshi jaq qyzmetin atqarýǵa daıyn. Halyqaralyq qatynastarda kez kelgen memleket shıelenis jaǵdaıynda deldal, úshinshi tarap arbıtraj bola almaıdy, ony da moıyndaýymyz kerek, ıaǵnı birinshi shart ekijaqty da qanaǵattandyrý kerek, ekinshi shart eki jaqqa da tepe-teń saıasat júrgizý qajet. Úshinshi shart eshbir óz múddesi bolmaýy kerek, jalǵyz múdde — beıbitshilik ornatý, — dep túıindedi Rızzat Tasym podkast barysynda.

Sarapshy keltirgen dáıekke súıensek, álemde joǵaryda atalǵan saıasatty júrgizetin elder sanaýly. 

— Buǵan deıin Ýkraına birneshe memleketti ataǵan bolatyn, mysaly Saýd Arabııasy, Reseı tarapy Majarstandy aıtqan bolatyn. Belarýste mundaı qadamdar jasap kórýge tyrysty, Lýkashenko AQSh pen Reseı arasynda deldal qyzmetin atqarýǵa kirisken edi, biraq, AQSh-qa Belarýsten sanktsııalardy alyp tastańdar, sodan keıin biz tolyqqandy asyramyz dep, kerisinshe Ýkraınadaǵy beıbitshilikke asa qatty múddeli emestigin kórsetip qoıǵannan keıin oıynnan tys qaldy. Al Qazaqstan tarapy bolsa, AQSh-pen de, Reseımen de, Ýkraınamen de osyndaı qyzmetti atqara alady degen úmit nyǵaıa túsken sekildi, — deıdi ol.

Budan buryn saıasattanýshy Qazaqstan 30 jyl ishinde orta derjava deńgeıine kóterilgenin aıtqan edi.