Reseı úkimeti taǵy bir áleýmettik jeli qurmaqshy
ASTANA. 16 maýsym. QazAqparat - Reseı Úkimeti 2012 jyldyń maýsym aıynyń sońyna deıin qoldanysta bar «Rossııabezdýrakov.rf» portalynyń bazasynda qarapaıym azamattarǵa óz akkaýnty men qoǵamdastyǵyn qurýǵa múmkindik beretin
jeke áleýmettik jelisin qurýdy josparlaýda. Bul týraly RBK saıtyna silteme jasap, Eýrazııa birinshi arnasy habarlaıdy.
Jańa áleýmettik jeli qoldanýshylarǵa «VKontakte» jelisindegi sııaqty toptar qurýǵa múmkindik beredi, onda azamattar túrli áleýmettik máselelerdi ortaǵa salyp, olardy sheshý boıynsha tájirıbelermen almaspaqshy. Jeli paıdalanýshylary kez kelgen kontentti, sonyń ishinde mátinder, fotosýretter, aýdıo- jáne beınematerıaldardy engize alatyn bolady.
Áleýmettik jeli qurastyrýshylary barlyǵyna yńǵaıly ınterfeıs jasaýdy josparlaýda, tipti ǵalamtordy jańa paıdalanýshylarǵa da atalmysh jeli túsinikti bolady dep kútilýde. Kremlde jobany jeke ınvestorlardyń qarjylandyryp jatqandyǵyn málimdedi. Alaıda onyń bıýdjeti týraly aqparat berilgen joq.
Sarapshylar óz kezekterinde jańa jobanyń tıimdiligine kúmán keltirýde. Olar «reseılik bılik qoldanysta bar áleýmettik jelilerdi qarjylandyrýy qajet edi, óıtkeni Facebook nemese «VKontakte» jelilerinen jaqsy jobany Úkimet te oılap taba almaıdy» dep esepteıdi.
