Reseı túrmesinde otyrǵan qazaqstandyqtardyń eshqaısysy soǵysqa áketilgen joq — SІM

ASTANA: KAZINFORM — QR Syrtqy ister mınıstrliginiń resmı ókili Aıbek Smadııarov Reseı túrmelerinde otyrǵan qazaqstandyqtarǵa qatysty málimdeme jasady.

Aptalyq brıfıngte tilshiler Reseı qalalarynda nashaqorlyq boıynsha túrmege túsken qazaqstandyqtardyń týystary Bas prokýratýraǵa júgingenin aıtty.

Olar Reseı túrmelerinde soǵysqa úgitteý bar ekenin aıtyp, balalaryn elge aýystyrýdy suraǵan. 

A. Smadııarov mundaı faktilerdiń onnan aspaıtynyn, konsýldar barlyq jaǵdaıdan habardar ekenin atap ótti. 

«Bul azamattar jumysty Telegram-arnalardan nemese áleýmettik jeliden tapqan. Olar qaıda baratynyn, ne isteıtigin bildi. Týystarymen bizdiń konsýldar baılanysta, birneshe ret baryp olarmen kezdesip keldi. Reseı tarapymen de — RF Syrtqy ister mınıstrligimen, jergilikti bılikpen baılanystamyz. Reseı túrmesinde otyrǵan Qazaqstannyń bir de bir azamaty soǵysqa áketilgen joq. Muny 100 paıyz rastaı alamyz. Adam qaı elde zań buzsa, sol eldiń zańymen jaýap berýi kerek. Jaza belgilenip, túrmege aýysqan soń prokýratýra iske kirisip, bizdiń elde jazasyn óteýge ǵana aýystyra alady. Bizdiń sotpen olardy sottaı almaımyz. Áleýmettik jelilerde jumys usynyp jatsa, muqııat tekserip, óz qaýipsizidkterińizdi oılaýdy suraımyn», — dedi QR Syrtqy ister mınıstrliginiń resmı ókili Aıbek Smadııarov aptalyq brıfıngte.