Reseı Túrkııaǵa charterlik ushýlarǵa tyıymdy alyp tastady
ASTANA. QazAqparat - Reseı Túrkııaǵa charterlik tasymaldarǵa tyıymdy alyp tastady, bul týraly tıisti qaýlyǵa Úkimet tóraǵasy Dmıtrıı Medvedev qol qoıdy, dep habarlady RIA Novostı.
Qujat charterlik ushýlarǵa tyıym salǵan 2015 jylǵy 30 qarashadaǵy úkimet qaýlysyna ózgerister engizedi.
«Túrik Respýblıkasymen turaqty ále qatynastaryn júzege asyrýda kólik (avıatsııalyq) qaýipsizdigin qamtamasyz etýge baǵyttalǵan qosymsha sharalar qabyldansyn», - delingen úkimet saıtynda jarııalanǵan qaýlyda.
Qujatta sondaı-aq avıatasymaldaýshylarǵa qaýipsizdiktiń qosymsha sharalaryn qamtamasyz etýdi usynǵan tapsyrma berilgen.
Reseı Prezıdenti Vladımır Pýtın 30 maýsymda Túrkııaǵa qatysty arnaıy sharalarǵa túzetýler engizgen jarlyqqa qol qoıdy. Tikeleı eki shekteý - Túrkııaǵa týrlar satýdan bas tartý týraly usynba jáne charterlik avıatasymaldarǵa tyıym alynyp tastaldy. Toǵyzynshy tamyzda Pýtın Túrkııa prezıdenti Rejep Taıyp Erdoǵanmen kezdesýde charterlik tasymaldardy qalpyna keltirý máselesi «tehnıkanyń isi» dep atady.
«Reseılik avıatsııa bıligi Túrkııaǵa charterlik ushýlardy júzege asyrý, sonyń ishinde reseılik avıakompanııalarǵa tıisti ruqsat berýdi bastaý úshin qajetti jaǵdaılardy kidirtpeı qamtamasyz etýge ázir», - dep málimdedi kólik mınıstri Maksım Sokolov.
Kólik mınıstrliginde qazirdiń ózinde reseılik kompanııalarǵa jedelhattar jiberilgenin atap ótti, al olar óz kezeginde Reseıavıatsııaǵa ótinish berýge kiristi.
