Reseı, Túrkııa, Ózbekstan: Qazaqstannan qaı elderge kóp aqsha aýdarylady

ASTANA. KAZINFORM – Qazaqstandaǵy jeke tulǵalardyń shottaryna qaı elderden aqsha kóp aýdarylady. Ulttyq bank 2025 jyldyń birinshi toqsanyndaǵy málimetterdi jarııalady.

Jalpy alǵashqy úsh aıda jeke tulǵalar Qazaqstanǵa 59,26 mln dollar aqshany qaıtarymsyz negizde aýdarǵan. Onyń 7,95 mln dollary TMD elderinen, 43,31 mln dollar basqa elderden. Jekelegen memleketterge kelsek, eń kóp aýdarylǵan soma AQSh (16,6 mln dollar), Germanııa (7,95 mln dollar), Ońtústik Koreıa (5,11 mln dollar), Reseı (4,77 mln dollar) elderine tıesili.

Al Qazaqstandaǵy jeke tulǵalardan qaıtarymsyz negizde 157,46 mln dollar aýdarylǵan. Aıyrmashylyq – 3 esege jýyq.

Onyń ishinde TMD elderine 93,6 mln dollar, basqa elderge 63,5 mln dollar jóneltilgen.

Jekelegen memleketterge kelsek, Qazaqstandaǵy jeke tulǵalardan eń kóp aqsha qabyldaıtyn el – Reseı Federatsııasy (59,24 mln dollar). Reseıden Qazaqstanǵa jeke tulǵalar aýdarǵan aqsha men Qazaqstannan Reseıge jeke tulǵalar aýdarǵan aqshanyń aıyrmashylyǵy – 12 ese. Ekinshi orynda Túrkııa tur. Bul elge Qazaqstandaǵy jeke tulǵalardan 27,72 mln dollar qaıtarymsyz negizde aýdarylǵan. Ózbekstan tek úshinshi orynda – 19,23 mln dollar. Sondaı-aq Grýzııaǵa 10,99 mln dollar aýdarylǵan.

Aıta ketý kerek, bıylǵy qyrkúıekte eldegi ekinshi deńgeıli bankterdiń bári «Ulttyq tólem korporatsııasynyń» aýdarym júıesine qosylady dep kútilip otyr.