Reseı turǵyny jolbarys pen arystannyń 4 kúshigin Qazaqstan zooparkine satpaq boldy

ASTANA. QazAqparat - Reseı kedenshileri úsh aılyq jolbarys pen arystan kúshikterin Qazaqstanǵa zańsyz kirgizýge jol bermedi, dep habarlaıdy QazAqparat Reseı federaldy keden qyzmetine silteme jasap.

Astrahan oblysynyń Qaraózek ótkizý pýnktinde jolaýshylar kóligin tekserý kezinde jyrtqyshtyń tórt kúshigi tabylǵan.

60 jastaǵy júrgizýshi olardy kóliktiń artqy oryndyǵynda janýarlarǵa arnalǵan plastıkalyq ydysqa salyp, áketip bara jatqan.

Qolynda eshqandaı ruqsat qujaty joq.

Er adam Sheshen Respýblıkasynan kúshik satyp alyp, qazaqstandyq jeke haıýanattar baǵyna satam dep josparlaǵan.

Janýarlar tárkilenip, ýaqytsha panalaıtyn yńǵaıly orynǵa ornalastyryldy.

Kontrabanda faktisi boıynsha qylmystyq is qozǵaý máselesi sheshilip jatyr.