Reseı tranzıtti qus etin Qazaqstanǵa ótkizý úshin talaptar qoıdy

ASTANA. QazAqparat - Qazaqstan Respýblıkasyna Reseı Federatsııasy arqyly keletin qus etiniń tranzıtine shekteý alynyp tastaldy. Bul týraly QR Aýyl sharýashylyǵy mınıstrliginiń baspasóz qyzmetinen málim etti, dep habarlaıdy QazAqparat.

Málim bolǵandaı, qus etiniń tranzıtine shekteýdiń alynýy - QR Premer-Mınıstriniń orynbasary-Aýyl sharýashylyǵy mınıstri Ómirzaq Shókeevtiń Reseı Federatsııasy Úkimeti tóraǵasynyń orynbasary Alekseı Gordeevpen kezdesýiniń nátıjesi.

22 qańtar kúni Máskeýde ótken kezdesýde qazaqstandyq tarap Rosselhoznadzor tarapynan úshinshi elderden qus etiniń tranzıtine Qazaqstan Respýblıkasynyń shekarasyn shekteý týraly máseleni kóterdi. Reseı ýaqytsha tranzıttik shekteýlerdi 2018 jylǵy 20 qarashada engizgen bolatyn.

«Reseı tarapy óz aýmaǵy arqyly qus etiniń tranzıtine shekteýdi kelesi eki jaǵdaı boıynsha alyp tastaýǵa kelisti: Reseı Federatsııasy arqyly Qazaqstanǵa tranzıtpen qus etiniń ımportyn júzege asyratyn kásipkerler, qozǵalysty qadaǵalaýdy qamtamasyz etý úshin «Merkýrıı» júıesine aqparatty engizýi tıis. Sondaı-aq qus ónimderin qaıta tıeý jáne ýaqytsha saqtaý tek mal sharýashylyǵy ónimderin saqtaý úshin EAEO sertıfıkattaǵan EO kásiporyndarynda júrgizilýi qajet. Búgingi tańda EO-nyń kedendik aýmaǵyna ákelinetin baqylaýǵa jatatyn taýarlardy óndirý, óńdeý jáne (nemese) saqtaý jónindegi uıymdar men tulǵalardyń Reestrine engizilgen mal sharýashylyǵy ónimderin saqtaý jáne satý boıynsha lıtvalyq 6 kásiporyn attestatsııalanǵan: «Ketonas», «Klaipėdos šaldytuvų terminalas», «Kaminatrans», «VPA Logistics» (2 sklada), «Klaipėdos Smeltė», «Frigolita», - delingen AShM habarlamasynda.