Reseı tórt afrıkalyq elmen vızalyq rejımdi jeńildetýdi qarastyrýda

ASTANA. KAZINFORM – Reseı Zambııa, Zımbabve, Mozambık jáne Esvatınımen vızalyq rejımdi jeńildetý boıynsha kelissózder júrgizip jatyr. Sonymen birge Máskeý Reseıge elektrondyq vıza alýǵa ruqsat etilgen afrıkalyq elder tizimin keńeıtýdi de josparlap otyr, dep habarlaıdy TASS.

RF Syrtqy ister mınıstrliginiń Afrıka memleketteri (Saharadan ońtústikke qaraı) departamentiniń dırektory Anatolıı Bashkınniń aıtýynsha, qazirgi ýaqytta atalǵan tórt elmen tıisti kelisimder pysyqtalýda.

«Qujattardyń jobalary sheteldik áriptesterge joldanyp, olardyń qaraýynda», – dedi ol «Afrıkanskaıa ınıtsıatıva» basylymyna bergen suhbatynda.

Dıplomat sondaı-aq Zımbabve, Kenııa jáne Esvatını azamattaryna Reseıge elektrondyq vıza rásimdeýge ruqsat berilgenin atap ótti.

Onyń aıtýynsha, bul tizimge bolashaqta basqa da afrıkalyq memleketter qosylýy múmkin.

Aıta keteıik, Reseıde zańsyz júrgen sheteldikterge mártebesin zańdastyrý úshin bir aı qaldy.