«Reseı temir joldary» Petropavl fılıalyna 2 mln teńgege jýyq aıyppul salyndy
PETROPAVL. KAZINFORM — «Reseı temir joldary» fılıalynyń Ońtústik Oral temir joly — Petropavl bólimi zańbuzýshylyqtarǵa jol bergen.
Bul QR Básekelestikti qorǵaý jáne damytý agenttiginiń SQO boıynsha departamenti júrgizgen tergep-tekserý kezinde anyqtaldy.
Vedomstvonyń málimetinshe, tekserýdi júrgizýge jergilikti kásiporynnyń shaǵymy negiz bolǵan. Olardyń pikirinshe, fılıal usynǵan temirjol vagondarynyń elektrondy tarazylaryna metrologııalyq qyzmet kórsetý baǵasy tym joǵary bolǵan.
Naryqtaǵy jaǵdaıdy taldaý qorytyndysy boıynsha fılıaldyń áreketinen ústemdigin paıdalanyp, bul qyzmetterge monopolııalyq joǵary baǵalardy belgilegeni anyqtaldy.
Tergep-tekserý de QR Kásipkerlik kodeksiniń 174-babynyń 1) tarmaqshasy buzylǵanyn rastady. «Reseı temir joldary» fılıalyna qatysty ákimshilik is qozǵalyp, zań buzýshylyqtardy joıý týraly nusqama shyǵaryldy.
Byltyr 24 jeltoqsanda sot «Reseı temir joldary» fılıalyna 1 mln 880 myń teńge aıyppul saldy jáne 7,3 mln teńge monopolııalyq kiris tárkilendi. Sot sheshimi áli zańdy kúshine engen joq.
Fılıal departamenttiń nusqamasyn oryndady. 2026 jyldyń 1 qańtarynan bastap elektrondy vagon tarazylaryna metrologııalyq qyzmet kórsetý baǵasy 28%, ıaǵnı 754 698 teńgeden 536 357 teńgege deıin (QQS-syz) tómendetildi.
Buǵan deıin «Reseı temir joldary» fılıalyna qatysty tergep-tekserý bastalǵanyn jazǵan edik.
