«Reseı temir joldary» fılıalyna qatysty tergep-tekserý bastaldy

ASTANA. KAZINFORM — Bıyl qańtar aıynan bastap «Reseı temir joldary» AAQ fılıaly qyzmet qunyn 9,5%-ǵa arttyryp, QQS-ty esepke alǵanda 845 261,76 teńgege deıin kótergen, dep habarlaıdy Soltústik Qazaqstan oblysy boıynsha Básekelestikti qorǵaý jáne damytý agenttiginiń departamenti.

Vedomstvo málimetinshe, departament óńirde 2024 jyldan 2025 jyldyń qańtar–aqpanyna deıingi kezeńde vagondardyń elektrondy tarazylaryn tekserýge arnalǵan qyzmetter naryǵyna jospardan tys taldaý júrgizdi.

Bul taldaýǵa sebep – «Agrimer Mamlutka» JShS-niń shaǵymy boldy. Kompanııa «Reseı temir joldary» AAQ Ońtústik Oral fılıaly kórsetetin metrologııalyq qyzmettiń (vagon tarazylaryn tekserý) baǵasy qymbattap ketkenin habarlaǵan.

— Ótinishke sáıkes, aǵymdaǵy jyldyń qańtar aıynan bastap «Reseı temir joldary» AAQ fılıaly qyzmet qunyn 9,5%-ǵa arttyryp, QQS-ty esepke alǵanda 845 261,76 teńgege deıin kótergen. Bul rette Qazaqstannyń basqa óńirlerinde osyǵan uqsas qyzmettiń quny shamamen 391 000 teńgeni quraıdy. Taldaý nátıjesinde kórsetilgen baǵanyń tym joǵary ekeni jáne bul básekelestikke qaıshy – monopolııalyq áreket bolýy múmkin ekeni anyqtaldy. Bul jaǵdaı Qazaqstan Respýblıkasynyń Kásipkerlik kodeksindegi 174-baptyń 1-tarmaǵyna saı keletin zańbuzýshylyq retinde qarastyrylyp jatyr. Osyǵan baılanysty monopolııaǵa qarsy organ resmı tergep-tekserýdi bastady. Bul tekseris 3 aıdan 5 aıǵa deıin sozylýy múmkin, — delingen departament taratqan aqparatta.

Budan buryn «Qazaqtelekom» Básekelestikti qorǵaý agenttigi júrgizip jatqan tergeýge qatysty pikir bildirdi.