Reseı Tájikstan men Ózbekstanǵa maımyl sheshegin anyqtaýǵa arnalǵan test júıelerin jiberedi

ASTANA. KAZINFORM – Keshe, 26 tamyzda Reseı Federatsııasynyń Tutynýshylardyń quqyqtaryn qorǵaý jáne adamnyń ál-aýqatyn baqylaý jónindegi federaldy qyzmetiniń (Rospotrebnadzor) bastamasymen Eýrazııalyq ekonomıkalyq odaqqa múshe memleketter halqynyń sanıtarlyq-epıdemıologııalyq salaýattylyǵy salasyndaǵy quzyretti organdar basshylarynyń kezekten tys otyrysy ótti. Bul týraly Rospotrebnadzordyń baspasóz qyzmeti habarlady.

Jıynǵa Armenııa, Belarýs, Qazaqstan jáne Qyrǵyzstannyń sanıtarlyq dárigerleri qatysty. Oǵan Tájikstan men Ózbekstannyń sanıtarlyq-epıdemıologııalyq qaýipsizdik salasyndaǵy quzyrly organdarynyń basshylary da shaqyryldy.

Eýrazııalyq ekonomıkalyq odaq elderi, sondaı-aq Tájikstan men Ózbekstan Reseıden maımyl sheshegin anyqtaıtyn test júıelerin jiberýdi surady. Osy aptada alǵashqy test júıeleri Ózbekstanǵa jetkiziletin boldy. 

Keńes músheleriniń aıtýynsha, maımyl shesheginiń EAEO-ǵa múshe elderde, sondaı-aq Tájikstan men Ózbekstanda taralý qaýpi tómen dep baǵalandy. Jıynda Eýrazııa aımaǵynyń barlyq elderinde júrgizilip jatqan indetke qarsy sharalar talqylanyp, shekaradaǵy karantındik baqylaý sharalary kúsheıtilgeni aıtyldy.

Dúnıejúzilik densaýlyq saqtaý uıymy Kongo Demokratııalyq Respýblıkasynda órship, vırýs kórshi elderge taralǵannan keıin eki jyl ishinde ekinshi ret maımyl aýrýyn jahandyq tótenshe jaǵdaı dep jarııalady.