Reseı tarapy EQYU-y aıasynda qolǵa alynǵan sharalardy qoldaıtyndyqtaryn bildirdi
ASTANA. 28 qarasha. QazAqparat /Aıdar Ospanalıev/ - Reseı tarapy Eýropadaǵy qaýipsizdik jáne yntymaqtastyq uıymynyń jahandyq deńgeıdegi transulttyq qaterlermen kúres áreketerine rıza. Sondaı-aq lańkestik áreketterimen kúres sharalary da jaqsy nátıje berip otyr.
EQYU esirtki saýdasymen jahandyq kúres jumystaryna barynsha dendep enip barady. Óz kezeginde qalyptasqan jaǵdaı uıymnyń esirtkige qarsy tujyrymdamasynyń qabyldanýyna yqpal etedi degen senim bar. Bul týraly búgin Astanada ótip jatqan EQYU sammıtiniń Sholý konferentsııasynyń plenarlyq májilisinde Reseı delegatsııasynyń basshysy Vladımır Voronkov málim etti.
Onyń sózine qaraǵanda, halyqaralyq uıymnyń uıymdasqan qylmyspen kúres jáne shekara qaýipsizdigin nyǵaıtýdaǵy jobalary kóńilge qonymdy. «Sondaı-aq biz uıymnyń XXI ǵasyrdyń qaýip-qaterlerimen kúres bastamalaryn da qoldaımyz. Úsh aptaǵa sozylǵan jáne úsh memlekette ótken EQYU Sammıtiniń Sholý konferentsııasy óziniń maqsat-mindetterin tolyq oryndady. Árıne munda nazardan tys qalǵan birshama máseleler de boldy. Biraq ol aldaǵy kúnniń úlesindegi máseleler jáne olardy sheshý isine aldaǵy bolatyn Samıt jańa serpin beredi degen oıdamyn". -dedi ol.
