Reseı tarapyna talaptarymyzdy ashyq aıttyq - Ilham Álıev
ASTANA. KAZINFORM – Biz Reseı tarapyna óz talaptarymyzdy ashyq aıttyq. Bul týraly Ázerbaıjan Prezıdenti Ilham Álıev Ázerbaıjan telearnasyna bergen suhbatynda málim etti. Kazinform bul týraly Azertag.az agenttigine silteme jasap habarlaıdy.
Ilham Álıevtiń aıtýynsha, 27 jeltoqsanda atalǵan talaptar resmı túrde Reseı tarapyna jetkizildi.
- Qandaı talaptar qoıyldy? Birinshiden, Reseı tarapy Ázerbaıjannan keshirim suraýy kerek. Ekinshiden, óz kinásin moıyndaý kerek. Úshinshiden, kináliler jazalanýy, qylmystyq jaýapkershilikke tartylýy jáne Ázerbaıjan memleketine, zardap shekken jolaýshylar men ekıpaj múshelerine ótemaqy tólenýi kerek. Bul – bizdiń shartymyz. Onyń birinshisi keshe oryndaldy. Bizdiń basqa shartymyz da qabyldanady dep úmittemin. Bul sharttardyń barlyǵy ádil. Eshqandaı tótenshe talaptar nemese artyq suraqtar joq, bul halyqaralyq tájirıbe men adamnyń qalypty minez - qulyq prıntsıpterine negizdelgen, - dedi Ilham Álıev suhbat barysynda.
Buǵan deıin Ázerbaıjan prezıdenti qazaq halqyna alǵys aıtyp, eki el arasyndaǵy dostyq pen baýyrlastyq aýyr synaqtan keıin kúsheıe túskenin jetkizdi.
Sondaı-aq, Pýtın men Álıev Aqtaý mańynda qulaǵan ushaqqa qatysty talqylaýdy jalǵastyrdy.