Reseı tarabynyń suranysyna qaramastan Qazaqstan Polshanyń balyq ónimderine shekteý qoımaıdy - G.Isaeva
ASTANA. QazAqparat - Reseı tarabynyń suranysyna qaramastan Qazaqstan Polshanyń balyq ónimderine shekteý qoımaıdy. Bul týraly búgin Ulttyq veterınarııa boıynsha referenttik ortalyqta bolǵan kezinde QR Aýyl sharýashylyǵy vıtse-mınıstri Gúlmıra Isaeva BAQ ókilderiniń saýalyna oraı osylaı dedi.
«Reseıdiń aýyl sharýashylyǵy ónimderin qadaǵalaý organy bizderge hat joldady. Onda Polshanyń 14 balyq óńdeý kásipornyn ınspektsııalaýdan bas tartqany aıtylǵan. Osyǵan oraı Reseıdiń aýyl sharýashylyǵy ónimderin qadaǵalaý organy Polshanyń atalǵan 14 kásipornynan balyq ónimderin alýǵa ýaqytsha shekteý engizdi. Biz bul shekteý sharasyna qosylmaımyz. Óıtkeni, «Inspektsııa júrgizý týraly» qoldanystaǵy erejege sáıkes eger ınspektsııa júrgizilmese onda nátıje de joq degen sóz. Sondyqtan Qazaqstan joq nátıjege qosyla almaıdy», - dedi ol.
Onyń atap ótýinshe, ınspektsııa nátıjesinde kásiporynnyń sapa, qaýipsizdik talaptaryna sáıkestigi, ıaǵnı, olardyń qaýipsiz ónim shyǵaratyndyǵy kórsetilýi tıis.
«Biraq, EAEO-nyń tehnıkalyq reglament talaptaryna saı kelmeıtin sapasy tómen ónimderdiń anyqtalý derekteri tirkelgen joq. Sebebi, ınspektsııanyń ózi júrgizilgen joq. Oǵan sáıkes teris nátıejeler de berilmeıdi. Sondyqtan bul rette Qazaqstan atalǵan sharalarǵa qosylmaıdy. Taǵy da qaıtalap aıtamyn, biz qoldanystaǵy zańnamany qatań ustanamyz», - dedi vıtse-mınıstr.
Sonymen qatar G.Isaeva elimizdiń Aýyl sharýashylyǵy mınıstri reseılik tarapqa resmı jaýap bergenin basa atap ótti.
