Reseı syrtqy qaryzy boıynsha sońǵy 100 jylda alǵash ret defoltqa ushyrady

MÁSKEÝ. QazAqparat – Reseı sońǵy júz jylda alǵash ret syrtqy qaryzy boıynsha defoltqa ushyrady, dep habarlaıdy QazAqparat BBC News-ke silteme jasap.

27 mamyrda 100 mıllıon dollar kóleminde protsent tólemi tólenýi kerek edi. Reseı tarapy aqsha Belgııanyń «Euroclear» qarjy qyzmetteri kompanııasyna jiberildi dep málimdedi. Sodan keıin ol tólem ınvestorlar arasynda bólinýi tıis bolatyn.

Bul tólem buǵattalyp, kredıtorlar dıvıdendterin almaǵan. Aqsha tólem jasalǵan kúnnen bastap 30 kún ishinde túsýi kerek edi, sondyqtan bul defolt dep sanalady. «Euroclear» barlyq sanktsııalardy ustanatynyn atap ótti.

Reseı úkimeti óz tólemderin ýaqytynda jasaǵysy keletinin málimdedi. 40 mlrd dollarǵa jýyq reseı qaryzy dollarmen nemese eýromen belgilengen, onyń jartysy elden tysqary jerde.

Óz kezeginde Kreml 23 maýsymda qaryz boıynsha barlyq tólemder shartta dollarmen nemese basqa da halyqaralyq valıýtamen kórsetilse de, Reseı banki arqyly rýblmen júrgiziletini týraly buıryq shyǵarǵan.

Bul defolt Reseı úshin qaǵaz júzindegi soqqy. Defolt jarııalaǵan elderge ádette qaryz berilmeıdi, biraq Reseıge sanktsııalarǵa baılanysty batys naryǵynda onsyz da qaryz berýge tyıym salynǵan.

Reseı sońǵy ret syrtqy qaryzy boıynsha defoltty 1918 jyly jarııalady. Ol kezde kommýnısterdiń kóshbasshysy V.Lenın bolshevıkter revolıýtsııasy kezinde Reseı ımperııasynyń qaryzyn tóleýden bas tartqan bolatyn.