Reseı strategııalyq shabýyldaýshy qarý-jaraq týraly kelisimsharttan bas tartýy múmkin
ASTANA. QazAqparat - Reseı strategııalyq shabýyldaýshy qarý-jaraq týraly kelisimsharttan shyǵýy yqtımal.
Eger AQSh óziniń zymyranǵa qarsy qorǵanys júıesin damytýdy odan ary jalǵastyrar bolsa Reseı dál osyndaı qadamǵa barmaq.
VVS-diń habarlaýynsha, bul jaıynda RF SІM Qaýipsizdik jáne qarýsyzdaný departamentiniń dırektory Mıhaıl Ýlıanov málim etken.
«AQSh-tyń Reseıdiń múddesin eskermesten zymyranǵa qarsy qorǵanys áleýetin ulǵaıtýdy jalǵastyra berýi alańdatady. Mundaı saıasat strategııalyq turaqtylyqtyń buzylýyna jáne Reseıdiń kelisimsharttan shyǵý quqyǵyn paıdalanýǵa ıtermeleý jaǵdaıyna ákele alady»,- dedi ol Interfakske bergen suhbatynda.
Aıta keteıik, 2010 jyldyń sáýirinde AQSh pen Reseı arasyndaǵy strategııalyq shabýyldaýshy qarý-jaraqtar týraly kelisimshartqa Pragada qol qoıylǵan edi. Atalǵan qujatqa sáıkes 2 memleket ózderindegi ıadrolyq oqtumsyqtar sanyn 1550-ge deıin azaıtýy tıis. Al qurylyqaralyq ballıstıkalyq zymyrandar sany 700-den aspaýy kerek.
