Reseı SІM: Bashar Asad bılikti beıbit jolmen tapsyratynyn aıtyp, elden ketti

ASTANA. KAZINFORM – Reseıdiń Syrtqy ister mınıstrligi Sırııadaǵy jaǵdaıǵa baılanysty málimdeme jasady, dep habarlaıdy Kazinform agenttigi.

- Sırııadaǵy oqıǵalardy úlken alańdaýshylyqpen baqylap otyrmyz. Sırııa Arab Respýblıkasy aýmaǵyndaǵy qarýly qaqtyǵysqa qatysýshylarmen kelissózder nátıjesinde Bashar Asad prezıdenttik qyzmetten bas tartyp, elden ketý týraly sheshim qabyldady jáne bılikti beıbit jolmen tapsyrýdy basa aıtty. Reseı bul kelissózderge qatysqan joq, - delingen RF SІM habarlamasynda.

Dıplomatııalyq vedomstvo Reseıdiń Sırııa aýmaǵyndaǵy áskerı bazalary joǵary daıyndyq rejıminde ekenin, biraq qazirgi ýaqytta olardyń qaýipsizdigine aıtarlyqtaı qaýip tónip turmaǵanyn málimdedi.

Qytaı da Sırııadaǵy jaǵdaıdy muqııat baqylap otyrǵanyn jáne elde turaqtylyqtyń múmkindiginshe tezirek qalpyna kelýine úmittenetinin jetkizdi.

Buǵan deıin Eýropalyq Odaqtyń Syrtqy ister qyzmeti Sırııadaǵy jaǵdaı boıynsha málimdeme taratqan edi.

Aıta keteıik, Sırııa oppozıtsııasy Damaskiniń Asad rejıminen azat etilgenin jarııalady. Sırııa prezıdenti Bashar Asad jeksenbi kúni Damaskiden belgisiz baǵytqa ushyp ketken. Bul týraly Sırııadaǵy adam quqyqtaryn baqylaý ortalyǵy habarlady.