Reseı SQO-dan ákelinetin qus ónimderine ýaqytsha shekteýdi aldy
Óńirlik kásipkerler palatasy baspasóz qyzmetiniń málimetinshe, Soltústik Qazaqstan oblysynyń 5 qus fabrıkasy 3 maýsymnan bastap Reseıge ónimderin qaıtadana eksporttaı alady.
Aıyrtaý aýdany Eletsk aýyldyq okrýginde Nıýkasl aýrýynyń tabylýyna baılanysty kórshi memleket byltyr 26 qyrkúıekten bastap shekaradan qus pen ınkýbatsııalyq jumyrtqany ótkizýge ýaqytsha tyıym salǵan edi. Sondaı-aq qustarǵa arnalǵan azyq-jemniń keı túrin, qustarǵa arnalǵan qondyrǵylar men tiri qusty Reseıge ótkizý shekteldi.
«Óńirdiń kásipkerleri shamamen 8 aı boıy Reseı memleketiniń naryǵyna shyǵa almady. Epızootıkalyq jaǵdaıdyń jaqsarýyna baılanysty, oblysta keshendi veterınarlyq is-sharalardyń júrgizilip, aımaqtandyrý jáne saýyqtyrý baǵdarlamalarynyń engizilýine baılanysty «Rosselhoznadzor» (Reseıdiń veternıanlyq jáne fıtosanıtarlyq qadaǵalaý jónindegi federaldyq qyzmeti) 3 maýsymnan bastap SQO-dan ákelinetin qus pen qus ónimderine shekteýdi alyp tastady», - deıdi SQO Kásipkerler palatasynyń bólim basshysy Baýyrjan Ahmetaev.
Mamandardyń aıtýynsha, qazir oblysta 7 qus fabrıkasy bar. Olardyń beseýi óz ónimderin, naqtyraq aıtqanda jumyrtqany Reseıge satady. Sońǵy úsh jylda jumyrtqa eksporty jylyna 11,7 mln-nan 33 mln danaǵa jetken. 2018 jyldyń alty aıynda 442 mln teńgeniń 27 mln dana jumyrtqasy kórshi elge shyǵarylǵan. Sarapshylardyń esepteýinshe «Rosselhoznadzordyń» shekteýinen keıin bıyl jarty jyldyń ishinde jergilikti kásipkerlerge jarty mlrd teńge shyǵyn kelgen.