Reseı Syrtqy ister mınıstri Sergeı Lavrov Samarqandqa bardy
ASTANA. KAZINFORM — Reseı Syrtqy ister mınıstri Sergeı Lavrov resmı saparmen Samarqandqa bardy.
Bul týraly Ózbekstan Syrtqy ister mınıstrliginiń baspasóz hatshysy habarlady.
Sapar barysynda eki eldiń syrtqy saıasat vedomstvolarynyń basshylary arasynda kezdesý men kelissóz ótkizý, sondaı-aq Ózbekstan-Reseı yntymaqtastyǵynyń ózekti máselelerin talqylaý josparlanǵany atap ótildi.
«Kommersant» basylymynyń málimetinshe, Reseı Syrtqy ister mınıstri Ózbekstan Prezıdenti Shavkat Mırzıeevpen de kezdesedi dep kútilýde.
— Kezdesý barysynda qazirgi kúrdeli geosaıası jaǵdaıdaǵy syrtqy saıası yntymaqtastyqqa basty nazar aýdarylady, — delingen habarlamada.
Sondaı-aq taraptar Reseı Prezıdenti Vladımır Pýtınniń 2024 jylǵy mamyrda Ózbekstanǵa memlekettik sapary barysynda qol jetkizilgen ýaǵdalastyqtardy iske asyrýdy jandandyrý arqyly Reseı-Ózbekstan jan-jaqty strategııalyq seriktestigi men odaqtastyq qatynastaryn odan ári damytý máselelerin qarastyrady.
Eske sala keteıik, Lavrov 22-23 sáýirde Ózbekstanǵa baratyny jaıly jazǵan edik.