Reseı sheteldik jumysshylardy jumystan shyǵarý tártibin jeńildetti

ASTANA. KAZINFORM — Jumys berýshiler aımaqta sheteldik jumys kúshin jaldaýǵa shekteýler engizilgen jaǵdaıda mıgranttardy zańdy negizde jumystan shyǵara alady. Qujatqa sáıkes, jańa zań 1 naýryzdan bastap kúshine enedi, dep habarlaıdy Kazinform. 

Buǵan deıin RF Eńbek kodeksinde sheteldik azamatpen eńbek shartyn buzý negizderiniń qatarynda federaldy deńgeıde shekteýler engizý bar edi. Endi bul tizimge aımaqtyq bılik organdarynyń sheshimderi qosyldy.

TASS jazýynsha, 2025 jyly mundaı shekteýler, máselen Máskeý oblysynda, Krasnodar ólkesinde, Novgorod jáne Tómengi Novgorod oblystarynda engizildi, onda aımaqtyq normatıvtik-quqyqtyq aktiler birqatar salada patent negizinde jumys isteıtin sheteldik azamattardy jumysqa tartýǵa tyıym saldy. 

Bul rette jumys berýshilerge bir jaǵynan osy shekteýlerdi saqtamaǵany úshin 1 mln rýblge deıin aıyppul tóleý nemese jumysyn toqtata turý qaýpi tóndi, ekinshi jaǵynan, olardyń sheteldik jumysshyny jumystan shyǵarý týraly sheshimi «barlyq quqyqtyq saldary bar zańsyz» dep tanylýy múmkin edi. Jańa ereje osy olqylyqty joıýǵa baǵyttalǵan.

Kazinform úshin arnaıy TASS seriktes agenttigi usynǵan.

Buǵan deıin Qyrǵyzstan Reseıdegi eńbek mıgranttary quqyǵy buzylýyna baılanysty EAEO sotyna shaǵymdanǵanyn jazǵan bolatynbyz. 

Sondaı-aq Máskeýde 2026 jyly mıgranttar úshin patent qymbattaıtynyn habarladyq. 

Qazaqstanǵa qaı elderden eńbek mıgranttary kóp keletinin myna materıaldan oqı alasyz.