Reseı sheteldik stýdentterdiń elge kelý tártibin jeńildetti
MÁSKEÝ. QazAqparat - Sheteldik stýdentterdiń Reseıde ýaqytsha bolý merzimi oqýdyń aıaǵyna deıin uzartyldy. Elde «Shetel azamattarynyń RF-daǵy quqyqtyq mártebesi týraly» zańǵa osyndaı ózgerister engizildi, dep habarlaıdy «QazAqparat» HAA-nyń Máskeýdegi menshikti tilshisi «Proekt 5-100» jobasyna silteme jasap.
Bul sheteldik stýdentterdiń barlyǵyna, sonyń ishinde memlekettik bilim berý uıymynyń daıyndyq bóliminde nemese daıyndyq fakýltetinde oqyp jatqandarǵa da qatysty. Oqýyn jalǵastyrý úshin basqa oqý ornyna aýysqan sheteldik stýdentter de endi RF-da oqýyn bitirgenge deıin qala beredi.
Budan tys, ózgerister daıyndyq bólimindegi oqýyn bitirgen jáne basqa oqý ornyna qabyldanǵan shetel azamattarynyń RF-da ýaqytsha bolý merzimin uzartýdy da kózdeıdi. Mundaıda sheteldiktiń elde ýaqytsha bolýyn uzartý týraly ótinishti aýmaqtyq kóshi-qon organyna JOO-nyń ózi tapsyrady.
Kópten kútken ózgerister Reseıdegi birqatar JOO, sonyń ishinde «Proekt 5-100» jobasyna qatysýshy ýnıversıtetter rektorlarynyń bastamasymen engizilip otyr.
Sankt-Peterbýrg Ulttyq aqparat tehnologııalary, mehanıka jáne optıka zertteý ýnıversıtetiniń Sheteldik stýdentterdi oqytý ortalyǵynyń dırektory Marına Serovanyń aıtýynsha, zańǵa ózgerister Reseıde oqyp júrgen shetel azamattarynyń múddesin qorǵaý maqsatynda engizilgen. «Osy zań kúshine engenge deıin shetel azamattary Reseıde oqýǵa asyqpaıtyn edi. Bul mıgratsııalyq erejelerdiń qatańdyǵymen baılanysty. Al endi daıyndyq fakýlteti jaı ǵana qosymsha kýrstar emes, joǵary kásibı bilim alýdyń bastapqy kezeńine aınalyp otyr. Budan bylaı sheteldik stýdent RF-da úzilissiz oqýyn jalǵastyra beredi», - deıdi ol.
