Reseı shekerine shekteý qoıylǵan soń Mańǵystaý qantty Jambyl oblysynan satyp ala bastady

AQTAÝ. QazAqparat - Mańǵystaýdaǵy dúkenderge turaqtandyrý qorynan qant jetkizile bastady, dep habarolaıdy QazAqparat «Kaspıı» ÁKK baspasóz qyzmetine silteme jasap.

Óńirdegi «Kaspıı» áleýmettik-kásipkerlik korporatsııasynyń turaqtandyrý qorynan ótken maýsym aıynda 70 kásipker qant aldy.

132 tonna qant óńirdegi shaǵyn kásipkerlerden bólek, «Dına», «Anvar», «Ideal Market» sekildi iri saýda jelilerine satyldy.

«Kaspıı» ÁKK turaqtandyrý qoryna tátti túıirshikter «Azyq-túlik kelisimshart korporatsııasy» arqyly tasymaldanyp keldi.

Endi áleýmettik-kásipkerlik korporatsııa qantty Jambyl oblysynan da jetkize bastady.

Qazir áleýmettik mańyzy bar azyq-túlik taýarlarynyń turaqtandyrý qorynda 195 tonna sheker bar.

- Biz osyǵan deıin qantty Astrahannan tasymaldaıtyn kásipkerden satyp alyp otyrdyq. Sońǵy shekteýlerge baılanysty olar jumysyn toqtatty. Qazir «Kaspıı» áleýmettik-kásipkerlik korporatsııasy arqyly qoljetimdi baǵada ala bastadyq. Osy qoımadan qant alýǵa úshinshi ret kelip turmyn. Qazir 2 tonna qant alyp bara jatyrmyn. Bul bizge 1 aıǵa jetedi dep jobalap otyrmyz, - dedi kásipker Meıirbek Mekeev.

Áleýmettik mańyzy bar azyq-túlik turaqtandyrý qorynda qant mólsheri jetkilikti.

Qordaǵy qant qala men aýdandardaǵy kásipkerlik bóliminiń suranys hatyna saı jeke kásipkerlerge satylady.

Foto: instagram.com/mangystau.news