Reseı shekarasynda júk kólikteri kepteliste tur — Memlekettik kirister komıteti

ASTANA. KAZINFORM — Memlekettik kirister komıteti 13 jeltoqsanǵa qaraǵan túnnen bastap «Syrym» avtkólik ótkizý pýnktinde Reseı Federatsııasyna qaraı 450-500 jýyq júk kóliginiń jınalyp qalǵanyn habarlady.

Batys Qazaqstan oblysy men Reseı Federatsııasynyń Samara oblysy aýmaǵynda aýa-raıy nasharlap, qalyń qar túsip, boran soǵyp, kóktaıǵaqqa baılanysty júk kólikteri 12 jeltoqsannan bastap óte almaı, turyp qalǵan.

— Reseı Federatsııasyndaǵy federaldy trassalar boıynsha qozǵalys ýaqytsha shekteldi, Reseı TJM málimeti boıynsha shekteýler shamamen 13 jeltoqsan saǵat 22:00–ge deıin qoldanylady, — delingen habarlamada.

Osy jaǵdaılarǵa baılanysty, júk kólikteriniń qozǵalýǵa múmkindigi joq jáne olar aýa-raıynyń jaqsarýyn kútip jatyr.

Atalǵan jaǵdaı boıynsha júrgizýshilerge túsindirme jumystar júrgizilip, kempıngterde aýa-raıy jaqsarǵansha kútip, basqa oblystardaǵy jaqyn mańdaǵy ótkizý pýnktteri arqyly marshrýt qurý usynyldy.