Reseı shekarasyna deıingi joldyń Atyraýdan shyǵatyn 5 shaqyrymyn jańǵyrtý bastaldy

ATYRAÝ. KAZINFORM – Byltyr Atyraý qalasynan Reseı Federatsııasynyń shekarasyna deıin qatynaıtyn joldyń Atyraýdan shyǵatyn 5 shaqyrymy jóndelmeı qalǵan edi. Endi joldyń bul bóligin jóndeý bastaldy.

Atyraý oblystyq jolaýshylar kóligi jáne avtomobıl joldary basqarmasynyń bas mamany Altynbek Beıbitovtiń deregine súıensek, jańǵyrtý jumysynyń merdigeri – «Kazahdorstroı» JShS.

– Buryn joldyń bul ýchaskesi úshinshi sanatta ári jolaqty edi. Endi birinshi sanatqa aýystyrylyp, oblystyq jolaýshylar kóligi jáne avtomobıl joldary basqarmasynyń teńgerimine berildi. Bul ýchaskeniń uzyndyǵy – 5 shaqyrym. Onyń ishinde temirjoldyń ústimen ótetin 89,4 metrlik kópir bar. Jańǵyrtý jobasy aıasynda eski kópir tolyq buzylyp, jańadan salynady. Jol tórt jolaqty bolady, - deıdi Altynbek Beıbitov.

Joba jetekshisiniń orynbasary Áset Bektenovtiń aıtýyna qaraǵanda, joldyń eski qabatyn buzý bastalǵan. Qazir kólik qozǵalysyn toqtatpaý úshin aınalma jol salynyp jatyr. Jol qurylysyna 10 jumysshy, 15 tehnıka tartylǵan. 

– Aldymen joldyń ústińgi qabatyn tolyq qazyp alamyz. Aınalma jol daıyn bolǵan soń negizgi qurylys jumystary bastalady, - dep málim etti Áset Bektenov.

Atyraý qalasynan Reseı Federatsııasynyń shekarasyna deıin sozylǵan joldyń jalpy uzyndyǵy – 277 shaqyrym. Onyń 272 shaqyrymyn jańǵyrtý aıaqtaldy. Endi Atyraý qalasynan shyǵa beristegi 5 shaqyrymdy 2026 jylǵa deıin aıaqtaý josparlanǵan. 

Eske sala ketelik, budan buryn Reseımen shekaradaǵy 10 aýylǵa baratyn jolda áli kúnge asfalt salynbaǵanyn jazǵan edik.