Reseı shekara mańyndaǵy aýmaqtarda shegirtke tektes zııankestermen kúresti tıisti deńgeıde júrgizbeı otyr - AShM

ASTANA. QazAqparat - Reseıdiń Qazaqstanmen shekaralas aýdandarynda shegirtke tektes zııankesterge qarsy hımııalyq is-sharalarynyń qarqyny tómen, tipti keıbir aýdandarda múldem júrgizilmeı jatqandyǵy egis alqaptaryna qaýip týdyryp otyr. Bul týraly búgin Aýyl sharýashylyǵy mınıstrliginde ótken brıfıngte Agroónerkásip keshenindegi memlekettik ınspektsııa komıtetiniń tóraǵasy Saqtash Qasenov málim etti.

«Statıstıkaǵa júginsek, 2012 jyly Qazaqstan 1 mln. 830 myń gektar aýmaqty shegirtki tektes zııankesterden alastady. 2013 jyly 3 mln. 212 myń gektar aýmaǵy tazartylsa, 2014 jyly 3 mln. 900 myń gektar jer óńdeldi. Erekshe atap óterlik jaıt, Qazaqstan basqa shekaralas aımaqtarymen salystyrǵanda Reseımen shektesetin aýdandarda hımııalyq óńdeý aýmaǵyn jyl saıynǵy jospardan eselep arttyryp keledi», - dedi komıtet tóraǵasy.

«Ókinishke qaraı, bizdiń teriskeıdegi kórshiler jumysty tıisti deńgeıde júrgizbeı otyr. Qazaqstannyń júrgizgen óńdeý jumystaryna bul keri áser etedi. Óıtkeni, eger reseılikter hımııalyq óńdeýlerdi odan ári kesheýildetse, bul shegirtkelerdiń Qazaqstan aýmaǵyna qaıtadan kóshýi múmkin. Aýyl sharýashylyǵy daqyldary men alqaptaryna eleýli zııan keltiredi», - deıdi S. Qasenov.

Onyń sózine qaraǵanda, kóshpeli kókqasqa shegirtkeler asa qaýipti zııankester tizimine engizilgen. Óıtkeni, olar jeldiń yqpalymen 200 shaqyrymǵa deıin jetip, kórshiles memleketter úshin de zor qaýip týǵyzady. Eske sala keteıik, aýyl sharýashylyǵy mınıstrligi 2014 jyldyń maýsym aıynyń sońynan shilde aıynyń basynda Reseıdiń Orynbor oblysynyń shekaralas Svetlınskıı, ıAsenskıı, Dombrovskıı aýdandarynan Aqtóbe oblysynyń Áıteke bı aýdany jáne Qostanaı oblysynyń Qamysty aýdanyna shegirtkelerdiń kóshýi boldy.