Reseı satyp alýy tıis «Sapsan» júrdek poıyzdaryn Qazaqstanǵa eshkim usynǵan joq
Osyǵan deıin birqatar BAQ betinde Siemens Velaro kompanııasyna tıesili 3-shi býyndaǵy poıyzdardyń 13 quramy Reseımen kelisimshart negizinde shyǵarylǵany jazyldy. Olardyń tek tórteýi ǵana jetkizilgen. Ózge quramdar Siemens kompanııasynyń Reseıden ketýine baılanysty ony satyp alýǵa nıet bildirgen tarap úshin shyǵarý josparlanǵan. Satyp alýshy qalǵan 9 quramdy alǵan jaǵdaıda oǵan úlken jeńildikter jasalmaqshy. Osyǵan baılanysty Reseıge berilýi tıis poıyzdardy Ýkraınaǵa nemese Qazaqstanǵa satý josparlanyp otyrǵany aıtylǵan.
«Deutsche Welle» basylymynda Siemens kompanııasy poıyzdarynyń bolashaǵy týraly jańalyq boldy. Alaıda bizge óndirýshiden eshqandaı usynys túsken joq jáne biz bul máseleni talqylaǵan da emespiz. Onyń ústine jańalyqta Qazaqstan satyp alýy múmkin tapsyrys berýshi retinde ǵana kórsetilgen. Odan basqa eshteńe joq. Sondaı-aq bul máselege pikir bildirip otyrǵan kontsernniń resmı ókiletti qyzmetkeri emes, osy salanyń sarapshysy»,-dep málimdedi QazAqparat tilshisine «Qazaqstan temir joly» UK» AQ -nyń BAQ-pen baılanys departamentiniń dırektory Qaısar Jumabaıuly.
Sonymen qatar ol temirjol kólikterine mamandanǵan SCI Verkehr konsaltıngtik kompanııasyn basqaratyn sarapshy Marııa Lennenniń pikirinen úzindini usyndy.
Ol Qazaqstandy poıyzdardy satyp alýǵa qaýqary jetetin naqty kandıdat retinde kóretinin aıtqan.
Qaısar Jumabaıuly atalmysh sarapshynyń «Bul elde qajetti qarjy da, júrdek poıyzdar júretin ara qashyqtyq ta bar»,-degen pikirin oqyp berdi.
Sonymen qatar Marııa Lenen atalǵan poıyzdardy Ýkraınaǵa berý týraly da aıtty. Poıyzdar Ýkraınany qalpyna keltirý isine úles qosar edi. Bul máseleni qazir saıasatkerler talqylap jatyr.
