Reseı sarapshysy: Qazaqstan jaǵdaıynda jylyna 6 mln. emes, 16 mln. sharshy metr turǵyn úı salýǵa bolady

ASTANA. 23 qazan. QazAqparat - «Vıkon» kompanııa toptaryn basqarýshy, reseılik sarapshy Vladımır Konovalov búgin «Ekspert» pikirtalas klýbynyń otyrysynda órkenıetti elderde jylyna salynýy tıis turǵyn úı kóleminiń normalary jóninde pikirimen bólisti.

«Órkenıetti elderde bir turǵynnyń basyna shaqqanda qansha sharshy metr turǵyn úı berilýi kerektigi jóninde arnaıy ólshemder bar. Máselen, AQSh-ta jylyna jan basyna shaqqanda 2 sharshy metr, al Eýropada 1,5 sharshy metr turǵyn úı berilip otyrady. Eger biz Qazaqstandy órkenıetti el dep esepteıtin bolsaq, onda jylyna kem degende 1 sharshy metr turǵyn úı paıdalanýǵa berilip otyrýy tıis. Búginde Qazaqstan jylyna 6 mln. sharshy metr turǵyn úı salýdy mejelep otyr, al shyndyǵynda 16 mln. sharshy metr salynýy qajet», - dedi V. Konovalov.

Degenmen, sarapshynyń pikirinshe, bul tapsyrmany oryndaý áý bastan-aq múmkin bolmady. «Bul 16 mln. sharshy metrdi qalaı salýǵa bolady? Bul múmkin emes. Óıtkeni Qazaqstan qazirgi qolda bar resýrstary men tehnologııalaryn qoldanatyn bolsa, onda qurylysshylar da, qurylys materıaldary da jetpeıdi», - dedi ol.

Onyń atap ótýinshe, bul problemalarǵa ásirese Ekinshi dúnıejúzilik soǵystan keıin Ulybrıtanııa, Frantsııa, Germanııa sııaqty elder de tap bolǵan. 

«Bul máseleni sheshýdiń joly árdaıym tek bireý ǵana bolǵan. Kez kelgen memlekette eń aldymen bilikti de bedeldi sarapshylar komıssııasy qurylǵan. Olar belgili bir mólsherde osynshama sharshy metr úı salý kerek degen meje qoıǵan da, soǵan shydas beretin tehnologııa tańdalǵan. Bul óte mańyzdy kezeń, tehnologııasyz mundaı aýqymdy jumysty eńserý múmkin emes», - dep toqtalyp ótti V. Konovalov.

Onyń sózderinshe, búginde sharshy metrdiń qunyn tómendetetin edáýir arzan  tehnologııalar bar. «Zamanaýı jetistikterdi paıdalana otyryp, Keńes odaǵy kezindegideı qurylys materıaldaryn shyǵaratyn óndiris oryndaryn qurý kerek», - dep túıindedi sarapshy.