Reseı sanktsııalary saldarynan 30 myńnan astam qazaqstandyq qurylysshy jumyssyz qalýy múmkin
NUR-SULTAN. QazAqparat – Reseıge salynyp jatqan sanktsııalardyń saldarynan qazaqstandyq qurylys salasynda 30 myńnan astam adam jumysynan aıyrylýy múmkin. Bul týraly Qazaqstan qurylysshylar odaǵynyń tóraǵasy Talǵat Erǵalıev málim etti, dep habarlaıdy QazAqparat tilshisi.
«Bizdiń odaq elimiz boıynsha 1200-den astam qurylys salasy uıymdarynyń basyn biriktirip otyr. Búginde Reseıge salynyp jatqan sanktsııalarǵa baılanysty otandyq qurylys salasy aıtarlyqtaı qıyndyqqa tap bolýda. Qurylys materıaldary qymbattaýynyń ekinshi tolqyny bastaldy», - dedi Talǵat Erǵalıev «Atameken» UKP-da onlaın ótken baspasóz máslıhatynda.
Onyń aıtýynsha, elimizge qurylys materıaldaryn jetkizýde de problema bar.
«Memlekettik satyp alý boıynsha smetalyq jobada kórsetilgen baǵa men qazirgi naryqtaǵy baǵanyń arasy jer men kókteı. Odan bólek, kórshi eldegi sanktsııalardyń saldarynan 30 myńnan astam qurylysshy jumyssyz qalmaq. Sonymen qatar 600-den astam qurylys nysany qarjysyz qaldy. Osy oraıda shuǵyl túrde aldyn alý sharasyn qabyldaý qajet», - deıdi ol.
Buǵan deıin Reseıge salynǵan sanktsııalardyń otandyq bızneske qalaı áser etip jatqany aıtyldy.
