Reseı salady delingen 3 JEO: Prezıdent Úkimet pen «Samuryqtyń» jumysyn synady

QYZYLORDA. KAZINFORM – Prezıdent Qasym-Jomart Toqaev V Ulttyq quryltaıda Kókshetaý, Semeı, Óskemen qalalarynda salynýy kerek bolǵan jańa jylý-elektr ortalyqtarynyń qurylysy tym uzaqqa sozylyp bara jatqanyn synady.

- Kókshetaý, Semeı, Óskemen qalalarynda jańa jylý-elektr ortalyqtaryn salý sııaqty mańyzdy jobalardy jedel iske asyrý kún tártibinde tur. Moıyndaý kerek, bul máseleniń sheshimi uzaqqa sozylyp ketti, al adamdar kútip júr. Bul synym Úkimet pen «Samuryq-Qazyna» qoryna qatysty. Kýrchatovta elektr stantsııasyn salyp, Ekibastuzdaǵy №2 GRES-te qosymsha energııa bloktarynyń ýaqytyly iske qosý kerek, №3 GRES-tiń qurylysyn bastaý qajet, - dedi Qasym Jomart Toqaev.

Elektr jelisiniń turaqtylyǵyn qamtamasyz etý úshin gaz generatsııasyn damytý kerektigi de aıtyldy.

- Tabıǵı gazdyń áleýeti jańa ken oryndaryn izdeý arqyly kúsheıtilýi múmkin jáne kúsheıtilýi kerek te. Ókinishke qaraı, kógildir otyn óndirisi ekonomıkamyzdyń ósip kele jatqan qajettilikterinen artta qalyp otyr. Byltyr ǵana taýarlyq gaz ımporty 18 paıyz ósip, 4,5 mıllıard tekshe metrge jetti. Al jańa gaz ken oryndaryn paıdalanýǵa berý baıaý júzege asyrylyp jatyr. Qazirgi ahýal tıimsiz josparlaýdyń tikeleı saldary bolyp otyr, - degen Memleket basshysy «QazaqGaz» basshylyǵyna óz qarajattaryna ınvestorlar tarta otyryp, perspektıvaly ýchaskelerdi ıgerýge kirisý tapsyrylǵanyn atap ótti.

- Úkimet «Samuryq-Qazyna» qorymen birlesip, geologııalyq barlaý jumystaryn jandandyryp, kómirsýtekterdiń jańa ken oryndaryn ıgerýdi qamtamasyz etýge tıis. Gaz óńdeý baǵytyndaǵy iri jobalardyń ýaqtyly iske qosylýyn baqylaýdy kúsheıtý qajet. Nıettestik týraly deklaratsııa emes, naqty nátıjeler qajet, - dedi Qasym-Jomart Toqaev.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.