Reseı rýbliniń devalvatsııasy men munaı baǵasynyń tómendeýinen Qazaqstanǵa kóp kólemde arzan janar-jaǵarmaı kelip jatyr
Bul týraly Ortalyq kommýnıkatsııalar qyzmetinde QR Energetıka vıtse-mınıstri Uzaqbaı Qarabalın málim etti.
«Reseı rýbliniń devalvatsııasy men munaı baǵasynyń tómendeýinen Qazaqstanǵa kóp kólemde arzan janar-jaǵarmaı kelip jatyr. 2015 jyldyń 1 qańtarynan bastap Reseıde Salyq manevri týraly zań kúshine enedi. Onda aktsızderdiń ındeksatsııasy jasalyp, munaý sektoryndaǵy salyq zańnamasyna edáýir ózgerister engizilgen. Sonyń ishinde munaıdyń eksporttyq baj salyǵyn kemitip, paıdaly qazbalardy óndirý salyǵyn ulǵaıtpaq. Salyq manevri engizilgennen keıin Reseıde janar-jaǵarmaı quny ózgeredi. Osy oraıda Qazaqstan úkimeti aldynda ishki naryqtaǵy munaı ónimderiniń baǵasyn turaqtandyrý boıynsha jumystardy atqarý mindeti tur. Sonymen qatar 2015 jyly 1 qańtardan bastap Qazaqstan, Reseı men Belarýs arasynda Eýrazııalyq ekonomıkalyq odaq aıasynda áriptestikti bastaıdy. Ony da eskerý qajet», - dep atap ótti vıtse-mınıstr.
Onyń aıtýynsha, qazirgi ýaqytta ishki naryqty qamtamasyz etý jumystary belsendi jalǵasýda. Búginde qorǵa 230 myń tonna janar-jaǵarmaı satyp alynǵan.
Bunyń aldynda habarlaǵanymyzdaı, Uzaqbaı Qarabalın janar-jaǵarmaıdyń baǵasy tómendeıtindigin málimdegen bolatyn. «Jaqynda quny úkimetpen qadaǵalanatyn munaı ónimderiniń baǵasy túsedi dep josparlanýda. AI-92 benzıni - lıtri úshin 128 teńgeden 115 teńgege, AI 80 - burynǵy deńgeınde 89 teńge deńgeıinde qalady. Dızel otyny 115 teńgeden 107 teńgege túspek», - dedi U. Qarabalın.
