Reseı resmı túrde Jırınovskııdiń sózin joqqa shyǵarýy kerek - Májilis depýtattary
ASTANA. QazAqparat - QR Parlament Májilisiniń birqatar depýtattary Syrtqy ister mınıstrliginen Reseı Memlekettik Dýmasynyń vıtse-spıkeri Vladımır Jırınovskıı men oppozıtsıoner Edýard Lımonovty Qazaqstanǵa kirýge tyıym salynǵan tulǵalar qataryna qosýǵa shaqyrady.
Sonymen qatar, depýtattar Vladımır Jırınovskııdiń málimdemelerin Reseıdiń resmı ókilderi tarapynan resmı túrde joqqa shyǵarylýy kerek dep sanaıdy. Búgin Májilistiń jalpy otyrysynda bul týraly depýtat Nıkolaı Logýtov málimdedi.
«Biz Jırınovskııdiń arandatqysh pıǵyldaǵy sózderin Reseı Federatsııasynyń resmı ókilderi jarııa túrde joqqa shyǵarýy tıis dep sanaımyz. Sonymen qatar, biz Qazaqstannyń Syrtqy ister mınıstrliginen Jırınovskıı men E.Lımonovty Qazaqstannyń aýmaǵyna kirýge tyıym salynǵan tulǵalar tizimine qosýǵa úndeımiz», - dedi depýtat Logýtov. Onyń aıtýynsha, Jırınovskııdiń jurt aldyndaǵy málimdemesi Qazaqstan men Reseıdiń áriptestigine, eki eldiń tarıhı baýyrlastyǵyna selkeý túsiredi.
«Bizdiń memleketimizdiń asa mańyzdy jetistikteriniń biri kópultty jáne kóp konfessııaly halyqtardyń yntymaq, birligi ekenin esten shyǵarmaýymyz kerek. Al Jırınovskıı men Lımonovtardyń málimdemelerin qaskóıler teris pıǵylda paıdalanýlary da múmkin», - dep sanaıdy N. Logýtov.
Atalǵan depýtattyq saýalǵa Májilistegi úsh parlamenttik fraktsııanyń basshylary men Qazaqstan halqy Assambleıasynyń depýtattary qol qoıyp, qoldaǵan.
