Reseı Prezıdenti pavlodarlyq turǵyndy Dostyq Ordenimen marapattady
MÁSKEÝ. QazAqparat – 4 qarasha kúni Máskeýdiń Kreml saraıynda Halyq birligi kúnine oraı ótken shara barysynda Reseı Federatsııasynyń memlekettik syılyqtarymen marapattaý saltanaty ótti. Bul týraly QazAqparat Qazaqstannyń RF-daǵy elshiligine silteme jasap habarlaıdy.
Marapattalǵandardyń arasynda Pavlodar oblystyq «Slavıan mádenı ortalyǵy» qoǵamdyq birlestiginiń basqarma tóraǵasy Tatıana Kýzına bar. Ol Dostyq Ordenine laıyq dep tanyldy. Nagradany Reseı Prezıdenti Vladımır Pýtın tabystady.
«Reseı men sheteldik seriktester arasyndaǵy qarym-qatynasty damytýǵa súbeli úles qosyp otyrǵan barsha sheteldik dostarymyzǵa alǵys bildiremin. Áý basta orys mádenıeti jáne orys memleketi kópultty jáne kópkonfessııaly retinde aıaqqa turǵan bolatyn», - dedi saltanatty shara barysynda V.Pýtın.
Óz kezeginde Tatıana Kýzına Kreml sahnasynda elderdiń birligi týraly aıta kele, Abaıdyń qara sózinen úzindi keltirdi.
«Bas-basyńa bı bolsań, manar taýǵa syımassyń, basalqańyz bar bolsa, janǵan otqa kúımessiń», degen. Sondyqtan jer betinde tarshylyq bolmasyn, Qazaqstanda da, Reseıde de beıbitshilik pen dostyq bolsyn. Bizdiń elderimiz kópultty jáne muny saqtap qalý asa mańyzdy. Qazaqstan men Reseı álemdegi eń jaqyn memleketter ekenin áriptesterimizben árdaıym aıtyp otyramyz. Biz dostyqty saqtaı aldyq, biz uly babalarymyzdyń laıyqty urpaǵymyz!», - dedi ol.
