Reseı Prezıdenti Reseı men Qazaqstan seriktestigin ilgeriletýge óńirlerdiń qosqan úlesin joǵary baǵalady
ASTANA. KAZINFORM — Prezıdent Qasym-Jomart Toqaev pen Prezıdent Vladımır Pýtın Omby qalasynda ótip jatqan XXII Qazaqstan — Reseı óńiraralyq yntymaqtastyq forýmynyń plenarlyq sessııasyna qatysty. Jıynda Pýtın aımaq basshylary men bıznestiń úılesimdi áreketiniń nátıjesinde saýda-sattyq jandanyp, ózara ınvestıtsııa aǵyny ulǵaıyp kele jatqanyn aıtty. Bul týraly Aqorda málim etti.
— Eń basty nárseni aıtaıyn: Reseı men Qazaqstannyń kólik jáne logıstıka salasynda, sondaı-aq ekonomıka men qoǵamdyq ómirdiń basqa da baǵyttarynda ózara tıimdi yqpaldastyqty arttyrýyna múmkindikteri mol. Osyndaı úılesimdi ári ujymdyq jumysty jalǵastyrsa, Reseı men Qazaqstannyń óńirleri eki eldiń baýyrlas halyqtarynyń ıgiligi úshin jan-jaqty strategııalyq seriktestik pen odaqtastyqty odan ári tereńdetýge eleýli úles qosady, — dedi Vladımır Pýtın.
Plenarlyq otyrysta Reseı Úkimeti tóraǵasynyń orynbasary Alekseı Overchýk, Qazaqstan Premer-mınıstriniń orynbasary – Ulttyq ekonomıka mınıstri Serik Jumanǵarın, Omby oblysynyń gýbernatory Vıtalıı Hotsenko, Pavlodar oblysynyń ákimi Asaıyn Baıhanov, Altaı ólkesiniń gýbernatory Vıktor Tomenko, Shyǵys Qazaqstan oblysynyń ákimi Nurymbet Saqtaǵanov sóz sóıledi.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
