Reseı Prezıdenti Kaspıı teńiziniń tartylý máselesine qatysty pikir bildirdi

ASTANA. KAZINFORM — Reseı Prezıdenti Vladımır Pýtın Kaspıı teńizi sýynyń azaıý problemasyna qatysty pikirin bildirdi, dep habarlaıdy Kazinform tilshisi.

Kaspııdegi sý deńgeıiniń tómendeýi týraly suraqty ÁzerTAG agenttiginiń ókili Sankt-Peterbýrg halyqaralyq ekonomıkalyq forýmy aıasynda halyqaralyq aqparat agenttikteri basshylarymen kezdesýde kóterdi.

— Aldyn ala zertteýler sý deńgeıiniń kúrt tómendeýi jalǵasyp jatqanyn kórsetip otyr. Kaspıı teńizindegi sýdyń 80 paıyzdan astamy Edil ózeninen keletinin eskersek, bul - eleýli másele. Osy baǵytta Reseı tarapy qandaı sharalar qabyldap jatyr? — dep surady agenttik ókili.

Vladımır Pýtın bul máseleniń rasynda óte mańyzdy ekenin jáne birlesken sheshimder qajet ekenin atap ótti.

— Bul máseleni Ázerbaıjan Prezıdenti Ilham Geıdaruly Álıev kóterdi. Men birden nazar aýdardym, óıtkeni bul jaǵdaı birshama nazarymnan tys qalyp qoıǵan eken. Biraq máseleniń kólemi óte aýqymdy, tipti jahandyq sıpatqa ıe deýge bolady. Biz Aral teńizimen bolǵan qaıǵyly jaǵdaıdy bilemiz. Sondyqtan mundaıda ýaqyt ozdyrmaı, kelisilgen sheshimder qabyldaý qajet, — dedi Reseı Prezıdenti.

Onyń aıtýynsha, Reseı úkimetine qajetti tapsyrmalar berilgen, al ázerbaıjandyq tarappen birlesken jumys jalǵasýda.

— Munda eń bastysy – sekirmeli, naýqandyq sharalar emes, tabandy ári júıeli jumys qajet. Jalpy, tabıǵı qubylystarǵa qarsy turý múmkin be, bilmeımin. Edil ózeni atyrabyndaǵy adam áreketinen bólek, munda jahandyq sıpattaǵy basqa da sebepter bolýy múmkin. Tarıhta mundaı qubylystar talaı ret bolǵan: birde Kaspıı kóteriledi, birde sýy qaıtadan azaıady. Sondyqtan naqty sebepterdi anyqtap, qaıtymsyz saldarǵa jol bermeý úshin qoldan kelgenniń bárin jasaýymyz qajet, — dep túıindedi Vladımır Pýtın.

Aıta keteıik, osy jıynda Qazaqstan men Reseı arasyndaǵy taýar aınalymynyń 95%-ǵa jýyǵy ulttyq valıýtalarmen júzege asyrylatyny aıtyldy.

Buǵan deıin Vladımır Pýtın Iran men Izraıl arasyndaǵy janjaldy sheshýdiń joly týraly aıtty.

Sondaı-aq Qazaqstanmen qarym-qatynasty damytýda eshqandaı qıyndyq joq ekenin jetkizdi.

Reseı Prezıdenti UQShU qyzmetiniń eshqashan úshinshi elderge qarsy baǵyttalmaǵanyn málimdedi.

Reseı Qazaqstanmen energetıkalyq yntymaqtastyqty keńeıtýdi kózdep otyr.

Pýtınniń paıymynshe, EAEO elderi biryńǵaı energetıkalyq naryqqa áli daıyn emes, biraq biz soǵan bara jatyrmyz