Reseı prezıdenti Qasym-Jomart Toqaevtyń fıdjıtal-sportty damytýdaǵy rólin joǵary baǵalady
ASTANA. KAZINFORM – Reseı Federatsııasynyń prezıdenti Vladımır Pýtın Astanada ótip jatqan «Bolashaq oıyndary – 2026» halyqaralyq týrnıriniń bastalýyna oraı beınequttyqtaý joldady.
Reseı prezıdentiniń aıtýynsha, bul biregeı saıys sportty zamanaýı ınnovatsııalarmen, al fızıkalyq daıyndyqty zııatkerlik qabiletpen ushtastyrady. Onyń basty mıssııasy – bolashaqqa umtylǵan, jańashyldyqqa ashyq, ozyq tehnologııalardy erkin meńgergen, bilimniń qadirin túsinip, únemi kemeldikke umtylatyn tulǵanyń jan-jaqty damýyna yqpal etý.
– Ýaqyt óte kele Oıyndar baǵdarlamasyndaǵy jarys túrleriniń sany da, jalpy fıdjıtal sporttyń aýqymy men tanymaldyǵy da arta túserine senimdimin. Reseı – álemdegi jetekshi sport derjavalarynyń biri, dańqty sportshylardyń, rekordtar men jeńisterdiń otany. Fıdjıtal-qozǵalystyń bastaýynda dál bizdiń el turǵanyn maqtan tutamyz. Sondyqtan bul sport túriniń damýyna barlyq qajetti jaǵdaıdy jasap kelemiz. Búkilreseılik fıdjıtal sport federatsııasy 2022 jyldyń qarasha aıynda quryldy. Al 2024 jyldyń aqpan-naýryz aılarynda elimizde alǵashqy «Bolashaq oıyndary» ótip, sportshylar men álem kórermenderiniń zor qyzyǵýshylyǵyn týdyrdy, – dedi V.Pýtın.
Óz sózinde V.Pýtın bul oıyndar áýelden saıası konıýnktýradan, kemsitýshiliktiń kez kelgen túrinen jáne qosarlanǵan standarttardan ada bolyp kelgenin ári solaı bolyp qalatynyn atap ótti.
– Eń bastysy – Oıyndardyń geografııalyq aýqymy keńeıip keledi. Bıylǵy estafetany byltyrǵy jarys qojaıyny Ábý-Dabıden qabyldap alǵan jarqyn, zamanaýı ári qarqyndy damyp kele jatqan Astana qalasy qabyldap otyr. Osy oraıda Qazaqstan Prezıdenti Qasym-Jomart Kemeluly Toqaevtyń fıdjıtal-qozǵalys pen «Bolashaq oıyndarynyń» damýyna qosqan eleýli úlesin erekshe atap ótkim keledi. Onyń jeke qoldaýy men osy bastamaǵa shynaıy qyzyǵýshylyǵynyń arqasynda úshinshi «Bolashaq oıyndary» Astanada ótip jatyr, – dedi RF prezıdenti.
Vladımır Pýtın Qazaqstannyń sporttyq áleýeti óte joǵary ekenin, el sportshylary bedeldi halyqaralyq jarystarda joǵary jetistikterge jetkenin aıtty.
– Biz qazaqstandyq dostarymyzdyń keńpeıildigi men qonaqjaılyǵy týraly jaqsy bilemiz. Sondyqtan bul oıyndar eń joǵary deńgeıde óterine, al sportshylar men jankúıerler komandalar arasyndaǵy tartysty básekeden erekshe áser alaryna senemin. Jarys qatysýshylaryna tolaǵaı tabys, al qonaqtarǵa jarqyn ári umytylmas áser tileımin, – dedi V.Pýtın.
Aıta keteıik, Astanada «Bolashaq oıyndary – 2026» týrnıriniń ashylý rásimi ótip jatyr.
Byltyr BAÁ Ábý-Dabı qalasynda Astana Bolashaq oıyndarynyń estafetasyn qabyldaǵan edi.
