Reseı Premer-mınıstri: Qazaqstan Eýrazııadaǵy toǵyz joldyń torabyna aınalady
ASTANA. KAZINFORM – Úkimet basshysy Oljas Bektenov Reseı Federatsııasynyń Premer-mınıstri Mıhaıl Mıshýstınmen kezdesýinde Qazaqstannyń tranzıttik áleýetin sóz etti.
- Reseı Qazaqstannyń syrtqy saýda seriktesteri arasynda jetekshi oryn alady. Ózara taýar aınalymy 2,6 trln rýblden nemese 13,7 trln teńgeden asty.
Ekonomıkalyq yntymaqtastyq jónindegi úkimetaralyq komıssııa úlken jumys atqarýda. Qazaqstanda ónerkásip, energetıka, kólik-logıstıkalyq ınfraqurylym salasyndaǵy strategııalyq jobalar tabysty iske asyp keledi, - dedi Mıhaıl Mıshýstın.
Reseı úkimetiniń basshysy eki eldiń aýmaǵy arqyly Eýrazııanyń asa mańyzdy tranzıttik marshrýttary ótetinin eske saldy.
- Biz Soltústik-Ońtústik halyqaralyq dáliziniń damýyna úlken kóńil bólemiz. Bolashaqta ol búkil eýrazııalyq óńir memleketteriniń múddesi úshin jahandyq kólik arterııasyna aınalatynyna senimdimin. Qazaqstan Eýrazııadaǵy toǵyz joldyń torabyna aınalady, - dedi ol.
Osyǵan deıin Qazaqstan men Reseı arasyndaǵy saýda aınalymy 11 aıda 24 mlrd dollardan asqany týraly jazdyq.