Reseı polıtsııasy qazaqstandyq jekpe-jek sheberine oq atý deregine qatysty málimdeme jasady
NUR-SULTAN. QazAqparat - MMA sportshysy Baǵdat Dúısembaev Máskeýdiń ońtústigindegi fıtnes-klýbtyń kúzetshisimen qaqtyǵys kezinde oq jaraqatyn alyp, aýrýhanaǵa jatqyzyldy. Bul týraly QazAqparat Sports.kz saıtyna silteme jasap habarlaıdy.
«Keshe Ordjonıkıdze kóshesi, 10a mekenjaıyndaǵy fıtnes-klýbtyń kúzetshisimen bolǵan janjal kezinde MMA sportshysy Baǵdat Dúısembaevtiń keýde tusyna oq tıgen. Zardap shegýshi N.I.Pırogov atyndaǵy qalalyq klınıkalyq aýrýhanaǵa jatqyzyldy», - dep taratty aqparatty TASS aqparat agenttiginiń derekkózi. Bul fakti boıynsha tergeý amaldary júrgizilýde.
Reseı ІІM 16 aqpanda Ordjnıkıdze kóshesinde eki er adam arasynda týyndaǵan janjal faktisi boıynsha tekseris bastalyp ketkenin málimdedi.
«Aldyn ala málimet boıynsha, janjaldasýshylardyń biri travmatıkalyq qarý qoldanǵan. Jábirlenýshi kómek alý úshin medıtsınalyq mekemege jetkizildi, oq atqan adam qashyp ketti», - dep habarlady bas keńseden.
Baǵdat Dúısembaev – Qazaqstan týmasy, onyń negizgi sport túri – erkin kúres. Sportshy jeti jekpe-jek ótkizip, onyń ekeýinde jeńiske jetip, tórteýinde jeńilip, bireýin teń aıaqtady.
