Reseı ózge eldermen áýe qatynasyn toqtatty
MÁSKEÝ. QazAqparat – Reseı 27 naýryzdan bastap koronavırýs keń taraǵan elderden turaqty jáne charterlik halyqaralyq áýe qatynasyn toqtatady. Bul týraly QazAqparat TASS agenttigine silteme jasaǵan habarlaıdy.
RF úkimeti baspasóz qyzmetiniń habarlaýynsha, osyndaı sheshim el úkimeti janyndaǵy koronavırýstyń taralýyna qarsy kúres jónindegi Úılestirý keńesi prezıdıýmy otyrysynda qabyldanǵan.
Alaıda bul shekteý koronavırýs taraǵan elderden reseılikterdi jetkizý jumystaryna qatysy bolmaıdy.
«2020 jyldyń 27 naýryzy, saǵat 00:00-den bastap Rosavıatsııa Reseı áýejaılarynan shetel áýejaılaryna jáne olardan keri turaqty jáne charterlik ushýlardy júzege asyrýdy toqtatady. Buǵan koronavırýs indetiniń taralýyna baılanysty shet memleketterden reseılikterdi Reseı Federatsııasyna shyǵarýmen baılanysty reıster enbeıdi», - delingen otyrys qorytyndysy boıynsha júktelgen tapsyrmada.
