Reseı Ózbekstanda taǵy bir AES salady

TAShKENT. KAZINFORM – Ózbekstan bir alańǵa eki atom elektr stantsııasyn ornalastyrýdy josparlap otyr, dep habarlaıdy Kazinform agenttiginiń menshikti tilshisi.

Tıisti kelisimge ózbek delegatsııasynyń Reseıge sapary barysynda qol qoıyldy. Qujatqa saı, «Rosatom» memlekettik korporatsııasy Djızak oblysynda anyqtalǵan alańda bir az qýatty jáne bir iri AES qurylysyn bastamaq.

«Uzatom» agenttigi ókilderiniń málimetinshe, árqaısysynyń qýaty 55MVt bolatyn eki «RITM-200N» rekaktory jáne jalpy enegrııa óndirý qaýqary 2000MVt-qa teń qos «VVER-1000» reaktory boı kóteredi.

Toqtala keteıik, buǵan deıingi ózbek AES-ine 55MVt 6 reaktordy (jalpy qýaty 330MVt) ornalastyrý jospary bolǵan. Endi olardyń sany ekeýge deıin qysqarady, tıisinshe onyń qýaty 110MVt-pen shekteledi. Sonymen qatar, belgilengen alańǵa, ıaǵnı Týzkan kóline taǵy bir iri atom stantsııasy salynady.

Eske salaıyq, buǵan deıin resmı Tashkent pen Býdapesht ózbek AES-ine salqyndatý júıesin engizý múmkindigin talqylap jatqanyn jazyp edik.

Qosa ketsek, taıaýda Qazaqstan halqyna Joldaýyn jarııalaǵan Prezıdent Qasym-Jomart Toqaev elde birneshe AES salý bastamasyn kótergen bolatyn. Tıisinshe, 25 qyrkúıekte alǵashqy AES-ke úzdik ataý berý konkýrsy bastaldy.