Reseı, Ózbekstan prezıdentteri Nursultan Nazarbaevty mereıtoıymen quttyqtady
Nursultan Nazarbaev Reseı Federatsııasynyń Prezıdenti Vladımır Pýtınmen telefon arqyly sóılesti. Áńgimelesý barysynda Vladımır Pýtın Elbasyn 80 jyldyq mereıtoıymen quttyqtap, myqty densaýlyq, qajymas qaırat jáne dostas Qazaqstan halqynyń ıgiligi úshin jańa tabystar tiledi.
Reseı Prezıdenti Nursultan Nazarbaevtyń saıası kóregendigi men mol tájirıbesi Qazaqstan men Reseı arasyndaǵy yntymaqtastyqty odan ári tereńdetýge jáne keńeıtýge, sondaı-aq Eýrazııalyq ekonomıkalyq odaq aıasyndaǵy ıntegratsııalyq protsesterdi kúsheıtetýge septigin tıgizetinine senim bildirdi.
Elbasy V.Pýtınge jyly lebizderi úshin alǵysyn bildirip, Qazaqstan-Reseı strategııalyq seriktestigi men odaqtastyq qatynastardy nyǵaıtýdy jalǵastyrýdyń mańyzdylyǵyn atap ótti. Telefon arqyly sóılesýge Reseı tarapy bastamashy boldy.
Sondaı-aq, Elbasy Nursultan Nazarbaev Ózbekstan Respýblıkasynyń Prezıdenti Shavkat Mırzıeevpen telefon arqyly sóılesti. Ózbekstan Prezıdenti Elbasyn mereıtoıymen quttyqtap, myqty densaýlyq, baqyt jáne Qazaqstannyń órkendeýi jolyndaǵy jaýapty qyzmetine jańa jetistikter tiledi.
Shavkat Mırzıeev Nursultan Nazarbaevtyń zor kúsh-jigeriniń, parasatty jáne kóregen basshylyǵynyń arqasynda Qazaqstan óziniń úlken ekonomıkalyq jáne zııatkerlik áleýetin tıimdi paıdalanyp, álemdegi eń qarqyndy damyp kele jatqan elderdiń birine aınalǵanyn atap ótti. Ózbekstan kóshbasshysy Tuńǵysh Prezıdent tek Qazaqstanda ǵana emes, sondaı-aq halyqaralyq arenada da zor qurmet pen bedelge ıe bolǵanyn atap ótti.
Elbasy Sh.Mırzıeevke jyly lebizderi úshin alǵysyn aıtyp, baýyrlas eki el arasyndaǵy dostyq pen tatý kórshilik qatynastardyń odan ári nyǵaıa túsetinine senim bildirdi.
Telefon arqyly sóılesýge ózbek tarapy bastamashy boldy.
